Дьокуускайга «Арассыыйа – мин устуоруйам» Устуоруйа пааркатыгар сарсыарда 11.00 чаастан «Арассыыйа Эйэ иһин!» быыстапка арыллыаҕа, дьиэ кэргэттэргэ аналлаах бырагыраамма, 12.00 чаастан «Арассыыйа судаарыстыбаннаһа үөскээһинин туһунан», «Биһиги бэйэбит дойдубут кырасдааннарабыт!» тиэмэнэн лиэксийэлэр ыытыллыахтара.
Күнүс 13.00 чаастан Орджоникидзе аатынан болуоссакка «Арассыыйа – бу биһиги!» диэн бырааһынньыктааҕы тэрээһин саҕаланыаҕа, хаһаахтар уонна дьаамсыктар ырыаларын XV өрөспүүбүлүкэтээҕи бэстибээлэ буолуоҕа.
Саха сирин норуоттарын муускаларын уонна тылынан уус-уран айымньыларын мусуойа күнүс 14:00 чаастан Д.К.Сивцев-Суорун Омоллоон аатынан Опера уонна балет судаарыстыбаннай тыйаатырын солистката Анна Дьячковская уонна кини үөрэнээччилэрин кэнсиэртэригэр ыҥырар.
Туймаада стадиоҥҥа эдэр футболистар Бүтүн Арассыыйатааҕы «Тирии мээчик» күрэхтэһиилэрин эрэгийиэннээҕи түһүмэҕэр күөн көрсүөхтэрэ.
Култуура уонна сынньалаҥ пааркатын аллеятыгар күнүс норуот уран тарбахтаахтарын быыстапката, сүрүн сыанаҕа киэһэ 19.00 чаастан «Арасыыйа, мин эйигин таптыыбын!» диэн кэнсиэрт буолуохтара.
17:00 чаастан Доҕордоһуу болуоссатыгар Арассыыйа күнүгэр анаммыт «Сомоҕолоһуу оһуохайа» тэриллиэҕэ диэн Ил Дархан уонна Бырабыыталыстыба пресс-сулууспата иһитиннэрэр.
Хаартыскаҕа Мария Васильева (ЯСИА) түһэриитэ.
-
0
-
0
-
0
-
0
-
0
-
0
