Ил Дархан Айсен Николаев эҕэрдэ тылыгар бэлиэтээбитинэн, Саха Сиригэр хас биирдии бэһис дьиэ кэргэн элбэх оҕолоох. Барыта 118 тыһыынчаттан тахса оҕону иитэр 34 тыһыынчаттан тахса элбэх оҕолоох ыал баар. Саха Сирэ оҕо төрөөһүнүгэр Уһук Илиҥҥэ бастакы, дойдуга сэттис миэстэҕэ сылдьар, ааспыт сылга өрөспүүбүлүкэ олохтооҕун ахсаанын мөлүйүөҥҥэ тиэрдибит оҕо күн сирин көрбүтэ. Онон демография бары көрдөрүүтүнэн биһиги дойду үрдүнэн бастыҥнар ахсааннарыгар киирэбит. Ийэ буолууну уонна оҕо аймаҕы өйүүргэ үбүлээһин кээмэйэ кэнники алта сылга (2018 сылтан) эрэгийиэҥҥэ аҕыстан элбэх төгүл улаатыннарыллан 29,5 млрд солкуобайга тэҥнэспит. «Дьиэ кэргэн диэн киһиэхэ туохтааҕар да күндү. Оттон дьиэ кэргэн бигэ тирэҕэ – таптал уонна бэриниилээх буолуу. Дьоллоох буолар туһугар бу иэйиилэргитин харыстааҥ», - диэн этэр Айсен Сергеевич.
Үгэс быһыытынан, Дьиэ кэргэн, Таптал уонна Бэриниилээх буолуу күнүгэр араас тэрээһиннэр ыытылыннылар. Ол курдук, хас биирдии куорат, улуус үөрүүлээх быһыыга өр сылга бииргэ олорбут кэргэнниилэргэ СӨ Бырабыыталыстыбатын иһинэн Кыраасданнар туруктарын аахтатын суруйар управление олохтообут «Килбиэннээх дьиэ кэргэн» анал бэлиэни уонна СӨ Ил Дархана Айсен Николаев аатыттан истиҥ тыллаах Эҕэрдэ суруктары туттардылар, «Бочуот кинигэтигэр» киллэрдилэр.
От ыйын 8 күнүгэр Дьокуускай куораттааҕы ГТАС салаатыгар саҥа кэргэннии буолар эдэр бааралары сэргэ, элбэх сыл бииргэ олорбут кэргэнниилэр муһуннулар. Саҥа ыал буолааччылар бүтүн Арассыыйатааҕы «Арасыыйа сүрэҕэ» дьиэ кэргэн уотун туттулар. Санаттахха, быйыл тохсунньуга «Арассыыйа» быыстапка-пуорумҥа уматыллыбыт дьиэ кэргэн уотун сороҕотун, пуорумҥа былыргы сахалыы үгэһинэн, сиэринэн-туомунан ыал буолбут эдэр кэргэнниилэр Владислав уонна Жанна Федоровтар аҕалбыттара. Бу күн эдэрдэргэ ГТАС үлэһиттэрэ кэргэннии буолбуттарын туһунан туоһу суругу туттардылар, онтон кырдьаҕас ыаллар сүбэ тыллардаах алгыстарын анаатылар. Маны сэргэ, бриллиантовай сыбаайбаларын бэлиэтиир, о.э. бииргэ олорбуттара 60 сылын туолбут Тамара Ильинична уонна Георгий Николаевич Степановтары үөрүүлээхтик чиэстээтилэр.
Үгүс дьону түмэ тарпыт кэрэхсэбиллээх тэрээһининэн эдэр кэргэнниилэр, өр сыл бииргэ олорбут, элбэх оҕолоох дьиэ кэргэттэр күргүөмүнэн сэлэлээн хаамыылара буолла. Икки тыһыынчаттан тахса киһи Саха сыыркатыттан саҕалаан Хомсомуол болуоссатыгар тиийэ сэлэлээн хааманнар, дьиэ кэргэн бигэ тыынын үөскэттилэр.
Чаҕылхай түгэнинэн дьиэ кэргэттэр кырачааннарын кэлээскэлэрин киэргэтэн хаампыттара буолла. Саха Сиригэр чахчы айар куттаах дьон олороллорун бигэргэтэн, хаамыы кыттыылаахтара оҕолорун кэлээскэтин араастаан киэргэппиттэрин көрөн киһи сөҕөр-махтайар. Манна араас остуоруйалар, олоҥхолор, мульткиинэлэр, киинэлэр ис хоһооннорунан киэргэтиллибит кэлээскэлэр, норуокка биллэр дьоруойдара бааллар. Кэлээскэлэрин кэрэ көстүүтүнэн, тупсаҕай оҥоһуутунан дьүүллүүр сүбэ кутун тутаннар, куонкурус кыайыылаахтарынан Курсовтар, Николаевтар уонна Семеновтар дьиэ кэргэттэрэ буоллулар.
Дьоһун бэлиэ түгэнинэн Хомсомуол болуоссатыгар «кыһыл көмүс» дьиэ кэргэттэри наҕараадалааһын буолла. Ырыа-тойук, үкҥүү-битии тохтоло суох ньиргийдэ.
Дьиэ кэргэн, Таптал уонна Бэриниилээх буолуу күнүгэр ыытыллыбыт тэрээһин чаҕылхай түгэнинэн эрэ буолбакка, Саха Сиригэр үгэс буолбут дьиэ кэргэн сыаннастарын тарҕатар, көлүөнэлэр сибээстэрин бөҕөргөтөр, дьиэ кэргэни сомоҕолуур, ийэ уонна аҕа оруолларын үрдэтэр.
Антонина НЕУСТРОЕВА,
Хаартыскалар Лена Васильева түһэриилэрэ уонна куйаар ситимиттэн
-
0
-
0
-
0
-
0
-
0
-
0
