- Аҕа Дойду сэриитэ 1418 күн барбыта. Оччолорго Саха Сиригэр нэһилиэнньэ ахсаана 413.8 тыһ.этэ. Сэрии кэмигэр 65386 киһи ыҥырыллан барбытыттан хонуу толоонугар 38415 дьоммут хаалбыттара, сураҕа суох 11217 дьоммут сүппүттэрэ. Сэрии кэмигэр Саха Сиригэр 58962 киһи, оҕо тыыннара быстыбыта, ол да буоллар биһиги дьоммут фроҥҥа көмөлөрө үтүмэн этэ.
Харчынан 37 мөл.тахса, облигациянан 57 мөл. тахса үп хомуллубута, 2.9кг. кыһыл көмүс, 550 киилэ үрүҥ көмүс. эт-балык 33тыыһ. буут, ол эбэтэр 4 эшелону мунньан ыыппыттара. 200тыһ. тахса сылаас таҥас тигиллибитэ, фроҥҥа көмөҕө 23 тыһ. тахса ат хомуллан ыытыллыбыта.
Быйыл Улуу Кыайыы 80 сыла буолар, оттон олунньуга Анал байыаннай дьайыы саҕаламмыта үс сыла буолар. Билигин киһи барыта быйылгы сыл кыайыыны аҕалыа диэн эрэл санаалаах. Элбэх ыччаттарбыт, дьоммут-сэргэбит Аҕа дойдуларын көмүскүү сылдьаллар. Сотору кыайыыны ситиһэн, дьоммут дойдуларыгар төннөн кэлиэхтэрэ.
Чечня сэриитигэр 18-19 саастаах уолаттарбыт кыттан, дьиэлэригэр эргиллэн кэлбиттэрэ. билиҥҥи курдук оччолорго психолог, көмөлөһөр тэрилтэ үөһэ тэрилтэ суох этэ. Уолаттар кэлбиттэрин кэннэ Александра Николаевна Маедо сүрүннээн, күүспүт-кыахпыт тиийэринэн эдэркээн дьоммут олохторун булуналларыгар көмөлөһөр этибит.
Бастакы Бэрэсидьиэммит Михаил Ефимович Николаев уонна куорат оччотооҕу баһылыга Илья Филиппович Михальчук элбэх көмөнү оҥорбуттара. Уолаттары түмэргэ Афганистан сэриитин кыттыылаахтара турунан, хас нэдиэлэ аайы ДОСААФ-ка мунньан ким-туох наадалааҕын билсэ-көмөлөһө тураллара. Оччолого реабилитация баарын өйдөөбөппүн. Уолаттары үлэҕэ, үөрэххэ киллэрии, аны прописка булуута кытаанахтык турара. Александра Николаевна элбэхтик сүүрэн-көтөн, быһаарсан ону ситиһэрэ. Мин наар арыаллыы сылдьар этим.
Кэлин Егор Афанасьевич Борисов эмиэ элбэхтик көмөлөспүтэ, ол да буоллар, улуустарга элбэх уолаттарбыт олохторун булуммакка бу орто дойдуттан барбыттара наһаа хомолтолоох. Маны тоҕо аҕынныҥ диэтэххитинэ, сотору Кыайыы күнэ үүнэн, дьоммут тоҕо анньан кэлиэхтэрэ. Чечня быһыыта-майгыта хатыламматын курдук сөпкө дьаһанан, улуустарынан, нэһилиэктэринэн күүстээх үлэ, көмө барыан наада. Бу сырыыга 19-20 саастаах уолаттар Анал байыаннай дьайыыга барбыттара элбэҕэ суох. Үксүлэрэ саастаах, өйдөрүн-санааларын сиппит дьон дойдуларын көмүскүү сылдьаллар. Бастаан кэллэхтэрин утаа дьиэ кэргэттэрэ күүс-көмө буолаллара биллэр, ол кэннэ үлэ булуута, дьоммутун арыылаан хаалларбакка барыларын көрсөн, үлэ-хамнас булалларыгар күүс-көмө буолуохпутун наада. Улуустарга сырыттахпына куруук итини кэпсиибин, дьоҥҥо тиэрдэ сатыыбын.
Онон кытаатан бары түмсэн, дьоммутун көрсөргө эрдэттэн кыралаан бэлэмнэнии үлэтин саҕалыаххайыҥ диэн ыҥырыахпын баҕарабын!
Хаартыска: Мария Васильева, СИА
-
1
-
1
-
0
-
0
-
0
-
0
