Сийиэскэ дойду бары эрэгийиэннэриттэн 850 дэлэгээт, ол иһигэр Арассыыйа бааһынай хаһаайыстыбаларын баһылыктара, тыа хаһаайыстыбатын кэпэрэтииптэрин салайааччылара, АПК билимин бэрэстэбиитэллэрэ, кытталлара күүтүллэр. Дэлэгээттэр дойду экэниэмикэтин сайыннарыыга пиэрмэрдэр уонна кэпэрэтииптэр хамсааһыннарын суолтатын, дойдуга ас-үөл өттүнэн куттал суох буолуутун хааччыйыы, тыа сирин кэлимник сайыннарыы уо.д.а. тустарынан киэҥ кэпсэтиини таһаарыахтара.
Саха Өрөспүүбүлүкэтиттэн төһө киһи уонна туох соруктаах баралларын туһунан АККОР өрөспүүбүлүкэтээҕи салаатын толоруулаах дириэктэрэ Зарема Бочкарева маннык кэпсээтэ:
– Саха Өрөспүүбүлүкэтиттэн АККОР өрөспүүбүлүкэтээҕи салаатын бэрэсидьиэнэ Александр Артемьев салалтатынан 40-ча киһилээх дэлэгээссийэ барыаҕа. Дэлэгээссийэ састаабыгар Ил Түмэн дьокутааттара Александр Атласов, Эдгар Константинов, Тихон Скрябин, АККОР улуустардааҕы салааларын бэрэссэдээтэллэрэ, бааһынай хаһаайыстыбалар баһылыктара, тыа хаһаайыстыбатын кэпэрэтииптэрин салайааччылар, тыа хаһаайыстыбатын улуустардааҕы департаменнарын начаалынньыктара киирдилэр. Үбүлүөйдээх дьоһун түһүлгэҕэ өрөспүүбүлүкэ тыатын хаһаайыстыбатын үлэтин-хамнаһын сырдатыахтара, үбүлээһин ырычааҕын, боломуочуйа улуустарга бэриллиитин, АПК үлэһиттэрин санаторий-куруорт путевкаларынан хааччыйыы тустарынан кэпсиэхтэрэ. Тустаах сиэксийэнэн үлэлиэхтэрэ, Арассыыйа Федерациятын Тыа хаһаайыстыбатын министиэристибэтин салалтатын, эппиэттэхэ үлэһиттэрин кытары көрсүөхтэрэ, онон салааларынан туруорар ыйытыктарын бэлэмнии сылдьаллар. Анал байыаннай дьайыы бэтэрээннэриттэн бааһынай хаһаайыстыбатын тэринэн үлэлиэн-хамсыан баҕарар киһи элбэх, инньэ гынан, бу хайысханан туох бырайыак, көмө баарын билсэр соруктаах Арассыыйа Дьоруойа Андрей Григорьев сийиэскэ кыттар баҕатын биллэрдэ.
-
0
-
0
-
0
-
0
-
0
-
0
