Ол курдук, Алексей Еремеев Нам улууһун Хатыҥ Арыы нэһилиэгин баһылыгын Иван Ноговицыны уонна Нам улууһун дьокутааттарын сэбиэтин бэрэссэдээтэлин Алексей Винокуровы кытары көрсөн кэпсэттэ. Көрсөөччүлэр испиикэргэ Саха Сирин уһулуччулаах судаарыстыбаннай уонна бэлитиичэскэй диэйэтэлин Илья Егорович Винокуров 130 сыллаах үбүлүөйүгэр аналлаах дьаһаллары бэлэмнээһин уонна ыытыы былаанын билиһиннэрдилэр. Муударай толкуйунан, тулхадыйбат быһаарыыларынан Аҕа дойду сэриитин тыйыс сылларыгар норуотун хоргуйууттан быыһаабыт И.Е. Винокуровы дьон-сэргэ махталынан ахтар. Кини Сэбиэскэй Сойуус Хомуньуус баартыйатын Киин кэмитиэтигэр хас да төгүллээх ыҥырыытын түмүгэр 1943 с. муус устар 13 күнүгэр «ВКП (б) Саха уоб. кэмитиэтэ тыа хаһаайыстыбатын салайыыга алҕастарын туһунан» уураах ылыныллыбыта.
Иван Ноговицын былаан биир сүрүн дьаһалынан Хатыҥ Арыы И.Е. Винокуров аатынан устуоруйаны уонна кыраайы үөрэтэр түмэлин өрөмүөннээһин буоларын бэлиэтээтэ.
Алексей Еремеев Нам улууһун баһылыгын дьаһалынан хамыыһыйаны тэрийэргэ сүбэлээтэ уонна бары өттүнэн өйөбүлү оҥорорго бэлэмин иһитиннэрдэ.
Маны таһынан, «Саха-кэриэйдэр» уопсастыбаннай тэрилтэ бэрэстэбиитэлэ, Арассыыйа суруналыыстарын чилиэнэ, «Саха кэриэйдэрэ – утум тардыыта» уонна «Корейцы в истории Якутии» кинигэлэр ааптардара Валерия Егорова-Тхе парламент испиикэрин кытта тус көрүстэ. Кини Аҕа дойду улуу сэриитигэр Кыайыыга кэриэйэ норуота дьоһун кылаатын бэлиэтээтэ. Кэриэйдэр өҥөлөрүн үйэтитэр уонна бу туһунан дьоҥҥо билиһиннэрэр сыаллаах «Саха-кэриэйдэр» уопсастыбаннай тэрилтэни Кыайыы 80 сылыгар аналлаах өрөспүүбүлүкэтээҕи тэрээһиннэргэ кытыннарарга көрдөстө.
Алексей Еремеев Саха Сирин сайдыытыгар кэриэйдэр кылааттарын туһунан сиһилии иһитиннэриилээх дакылааты Аҕа дойду сэриитигэр Улуу Кыайыы 80 сылыгар аналлаах парламент дьаһалларын бырагырааматыгар киллэрэр туһунан суругу биэрэргэ көрдөстө.
Иһитиннэрии уонна хаартыска: Ил Түмэн пресс-сулууспата
-
0
-
0
-
0
-
0
-
0
-
0
