Өлүөнэ өрүстээҕи уу управлениетын салайааччыта Петр Аргунов 2025 с. 25 гидротиэхиньиичэскэй тэрили, экологическай кутталы үөскэтэр 9 эбийиэги, ол иһигэр нефтебазалары, суудуналар турар сирдэрин бэрэбиэркэлииллэрин туһунан эттэ. Бу үлэни кулун тутар бүтүүтүгэр саҕалыахтара. Ону таһынан, мууһу чарааһырдарга хараардыы үлэтэ ыытыллыаҕа, сорох сирдэринэн эрбиэхтэрэ. Халаан уутун аһарарга үбүлээһин быйыл 10 мөл. солк. улааппыт, федеральнай бүддьүөттэн 55,4 мөл. солк. көрүлүннэ.
СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччыта Андрей Коноплев этэринэн, быйыл харыы тахсыан сөптөөх 33 сиргэ муус халыҥын чарааһырдыахтаахтар. 11 судаарыстыбаннай хантыраагы түһэрсибиттэр, үлэни муус устар 15 күнүгэр диэри бүтэриэхтээхтэр. Мууһу хараардарга күн бүгүн инертнай матырыйаалы мунньа сылдьаллар, ону таһынан, өрүс төрдүн ыраастыахтара.
СӨ Гражданскай көмүскэбил дьыалатыгар уонна нэһилиэнньэ олоҕор-дьаһаҕар куттал суох буолуутун хааччыйыыга миниистирин бастакы солбуйааччыта Айаал Вензель 140 тахса былааннаммыт соруктан 60% оҥоһуллубутун иһитиннэрдэ. Ыксал тирээтэҕинэ, иһитиннэрии ситимэ хайдах үлэлиирин бэрэбиэркэлээбиттэр.
Быйыл 121 нэһилиэнньэлээх пууну халаан уута ылыан сөп, онно 24 000 тахса киһи олорор. Тиэргэни уонна дьиэни уу ыллаҕына, 293 быстах кэмҥэ олорор пууну, СӨ Тыатын хаһаайыстыбатын министиэристибэтин иһинэн ынаҕы-сүөһүнү быстах кэмҥэ тутарга 116 пууну бэлэмниэхтэрэ. Уу киртийдэҕинэ дезинфекциялыыр сириэстибэлэри хаһааннылар, Роспотребнадзор уу хаачыстыбатын кэтээн көрүөҕэ.
Гидрологическай балаһыанньаны 120 бастайааннай уонна 81 быстах кэмҥэ оҥоһуллубут гидропуостарга кэтээн көрүүнү ыытыахтара. Өрөспүүбүлүкэ бырабыыталыстыбата уонна бэйэни салайыныы уорганнара үп-харчы саппааһын уонна матырыйаалынай ресурсалары бэлэмнээтилэр. Суол пуондатыгар 150 мөл. солк., чуолаан халаан уута эрэгийиэннээҕи суолу-ииһи быстаҕына, алдьаттаҕына, ону чөлүгэр түһэрэргэ 100 мөл. солк., олохтоох суолга 50 мөл. солк. көрүлүннэ.
Хаартыска СИА.
-
0
-
0
-
0
-
3
-
2
-
0
