Уопсастыба

Ол эрээри, сахалыы тылынан иитии-үөрэтии тиһигэ быстыбатын туоһулаан, Дьокуускай куорат олохтооҕо, Арассыыйа Суруналыыстарын сойууһун чилиэнэ Парасковья Попова-Тускулаана биһиэхэ маннык суруйда:

– Киин куоракка 10 №-дээх «Туллукчаан» оҕо сайдар киинэ (сэбиэдиссэй Айталина Кротова) биир бастыҥ үлэлээҕинэн биллэр. Киин иитэр-үөрэтэр үлэһиттэрэ сахалыы эйгэни тэрийэн, куорат кырачааннара төрөөбүт тылларынан саҥара-иҥэрэ, айа-тута улааталларын туһугар сыралаһан үлэлииллэр. Күннээҕи үлэ былааныгар киллэрэн, араас дааталарынан элбэх кэрэхсэбиллээх дьаһаллары тэрийэллэр, онуоха төрөппүттэри көхтөөхтүк кытыннараллар. Бу күннэргэ уһуйаан 45 сылын бэлиэтээһин чэрчитинэн ыытыллыбыт «Мин "Туллукчааммын" хоһуйабын» диэн хоһоон куонкуруһугар иитээччилэр Парасковья Попова, Мария Максимова дьарыктыыр «Мичээр» бөлөҕүн иитиллээччилэриттэн алта оҕо уонна биир төрөппүт «Хайҕал суругунан» бэлиэтэннилэр. Бүгүн кинилэри билиһиннэриэхпитин баҕарабыт.

Дьиэ, дьиэ, дьиэ, мин эйигин таптыыбын,

Күн, күн, күн, доруобай буол,

Мас, мас, мас, эн кэрэҕин.

«Туллукчаан» уһуйаан, эн үчүгэйгин!

                        Коля Иннокентьев

Гирлянда уота
«Туллукчааммын» киэргэтэр,
Түннүкпэр күн тыгар,
«Мичээрбин» сылытар.
Симоналыын биһиги
Бииргэ оонньуубут,
Ырыаны, хоһоону
Бииргэ үөрэтэбит.

                  Сайдаара Бурнашева

Кып-кыра чычып-чаап
Хап-хара харахтаах,
Кып-кыра чычып-чаап
«Туллукчаан» диэн ааттаах.
Кып-кыра чычып-чаап,
Мин эйигин таптыыбын.

                   Алиса Оконешникова

«Туллукчааммын» ахтабын
«Туллукчааммар» күн ахсын кэлэбин,
«Туллукчааммын» таптыыбын,
«Туллукчааным» мин көмүс биһигим
                 Святослав Христофоров

Күннүүн тэҥҥэ уһуктан,

«Туллукчааҥҥа» сүүрэбит.

«Туллукчааҥҥа» үүнэбит-сайдабыт,

«Туллукчааҥҥа» ыллыыбыт-туойабыт,

«Туллукчааҥҥа» үөрэбит-көтөбүт,

«Туллукчааммытын» таптыыбыт!

                   Айсана Яковлева

Таптыыбын сүүрэрбин-көтөрбүн.

Таптыыбын ааҕарбын-суоттуурбун,

Таптыыбын эти-хааны эрчийэрбин,

Таптыыбын саҥаны билэрбин.

                  Богдан Кылыяров

Бу хоһооннор тыллара омос истэргэ наһаа судургу, биирдиҥи халыыптаах курдук буолуохтара эрээри, оҕолор кыра саастарыттан төрөөбүт тылларынан санааларын сайа этэргэ, бэйэлэригэр сөптөөх хоһоону доргуччу ааҕарга, өссө айарга холоноллоро итиэннэ онно төрөппүттэр көх-нэм буолаллара, көмөлөһөллөрө атыттарга холобур буолар хайҕаллаах уонна махталлаах дьыала. Сахалыы саҥа сайда туруохтун. 

Хаартыскалары Парасковья Попова-Тускулаана хааччыйда