Ол курдук, Саха Сирэ патриоттуу иитии сүрүн өйдөбүллэрин быһаарыыга биир кэлим сыһыаны олохтуурга этии киллэрэр. Алексей Еремеев салалтатынан Ил Түмэн «Арассыыйа Федерациятын кыраасданнарын патриоттуу иитии тиһигин төрүттэрин туһунан» федеральнай сокуон барылын бэлэмнээтэ. Докумуон Арассыыйа саҥа субъектарын, о.э. Крым Өрөспүүбүлүкэтин уонна Донецкай Норуодунай Өрөспүүбүлүкэни учуоттаан оҥоһулунна.
Алексей Еремеев этэринэн, маннык сокуону ылыныы чопчу федеральнай таһымҥа судаарыстыбаннай көҕүлээһиннэри ордук көдьүүстээхтик олоххо киллэрэргэ көмөлөһүө, социальнай туруктаах буолууну харыстыырга патриоттуу иитии оруолун күүһүрдүө.
«Биһиги федеральнай таһымҥа ылынарга киллэрэр сокуоммут булгуруйбат кырасдааныскай санаалаах, дьиҥ патриоттардаах дойдубут модун держава буоларын туһугар туһуламмыт соруктары ситиһэргэ өссө биир наадалаах миэрэнэн буолар», - диэтэ Ил Түмэн бэрэссэдээтэлэ.
Федеральнай таһымҥа эдэр дьон бырааптарын олоххо киллэрии эйгэтигэр кэккэ боччумнаах быһаарыылар ылыллаллар. Ол курдук, ааспыт сыл бүтүүтэ «Арассыыйа Федерациятыгар ыччат бэлиитикэтин туһунан» саҥа сокуон ылыллыбыта. Госдуума профильнай кэмитиэтин бэрэссэдээтэлэ Артем Метелев бэлиэтииринэн, саҥардыллыбыт сокуон ыччаты патриоттуу уонна духуобунай сиэр-майгы өттүнэн иитиини хайыы-үйэ бигэтитэр. Ол эрээри, «бары өрүттэр үлэлэрин дьүөрэлииргэ», «субъектары уонна соруктары быһаарарга» федеральнай сокуон наада.
Госдума Саха Сирин көҕүлээһинин өйүүр. Билигин ыччаты патриоттуу иитии туһунан сокуон барылын Госдуума ыччат бэлиитикэтигэр кэмитиэтэ, СӨ Судаарыстыбаннай Мунньаҕа (Ил Түмэн), Ыччат дьыалаларыгар федеральнай ааҕыныстыба (Росмолодежь) уонна Арассыыйатааҕы кырасдааныскай уонна патриотическай иитии киинэ (Роспатриотцентр) холбоһон оҥороллор.
Артем Метелев этэринэн, дойдуга аан бастакытын толору ырытыы ыытыллыаҕа, Арассыыйаҕа ыччат балаһыанньатын туһунан судаарыстыбаннай дакылаат бэлэмнэниэҕэ. Онон көдьүүстээх сыаналааһын ньыматын, мониторинг кээмэйин эрдэттэн быһаарыахха наада.
Иһитиннэрии уонна хаартыска: Ил Түмэн пресс-сулууспата
-
0
-
0
-
0
-
1
-
0
-
0
