Уу таһыгар тырааныспары сууйар көҥүллэммэт!
Уу эбийиэктэрин тулата харыстанар балаһалаах буолар. Холобура, Өлүөнэ өрүс уутун харыстыыр сир 200 миэтирэ иэннээх. Сүрүннээн бары уу түөлбэлэрэ 30 м. усталаах харыстанар балаһалаахтар.
РФ Уу Кодексата этэринэн харыстанар сиргэ, кытаанах бүрүөһүннээх суолтан ураты, тырааныспарынан айанныыр, туоруорар уонна сууйар кытаанахтык бобуллар. Онон маннык быһыыланыы Уу Кодексын ирдэбилин кэһии буолар.
Сокуонунан, уу эбийиэгин харыстыыр сир анал эрэсиимин кэһээччилэргэ РФ КоАП 8.42-с ыстатыйатын 1-кы чааһын быһыытынан ыстараап көрүллэр. Ол курдук, кыраасданнарга 3 тыһыынчаттан 4,5 тыһыынчаҕа тиийэ, дуоһунастаах дьоҥҥо (тэрилтэ тырааныспарын туһанар түбэлтэлэригэр) 8 тыһыынчаттан 12 тыһыынчаҕа тиийэ, онтон юридическэй сирэйдэргэ 200 тыһыынчаттан 400 тыһыынча солкуобайга тиийэ ыстырааптар көрүллэллэр.
Бөҕү хааллардыҥ – эппиэттээ!
Бөҕү анал көҥүллэммит эрэ сиргэ быраҕыахтааххын. Онтон атын сиргэ, ол иһигэр уу эбийиэгин харыстыыр сиргэ бөҕү хаалларар бобуллар. Бэрээдэги кэһээччи эппиэтинэһи РФ КоАП 8.2 ыстатыйатын 1-кы чааһынан сүгэр уонна 2 тыһ. солкуобайтан (кыраасдан) 250 тыһыынчаҕа тиийэ (юридическэй сирэй) ыстырааптанар.
Бөҕү көҥүлэ суох сиргэ массыынаттан быраҕар түгэҥҥэ бэрээдэги кэһээччи РФ КоАП 8.2 ыстатыйатын 3.1 чааһынан эппиэттиир. Кыраасданнарга 10 тыһыынчаттан 15 тыһыынчаҕа тиийэ, дуоһунастаах дьоҥҥо 20 тыһыынчаттан 30 тыһыынчаҕа тиийэ, юридическэй сирэйдэргэ 30 тыһыынчаттан 50 тыһыынча солкуобайга тиийэ ыстырааптаналлар.
Таһаҕаһы тиэйэр массыынаттан уонна бирисиэптэн бөҕү бырахтахха РФ КоАП 8.2 ыстатыйатын 3.3 чааһынан көрүллэр ыстыраап сыаната өссө үрдүк. Ол курдук, кыраасданнарга 40 тыһыынчаттан 50 тыһыынчаҕа тиийэ, дуоһунастаах дьоҥҥо 60 тыһыынчаттан 80 тыһыынчаҕа тиийэ, онтон юридическэй сирэйдэргэ 100 тыһыынчаттан 120 тыһыынча солкуобайга тиийэ ыстырааптар көрүллэллэр.
Иһитиннэрии уонна хаартыска: https://t.me/ecoyakutia
-
0
-
0
-
0
-
0
-
0
-
0
