Айсен Николаев пуорум кэмигэр Донецкай Норуодунай Өрөспүүбүлүкэ баһылыга Денис Пушилины кытта көрүстэ. Өрүттэр эрэгийиэннэр икки ардыларынааҕы бииргэ үлэлээһини, чуолаан Арассыыйа Дьоруойа Андрей Григорьев-Тута туһунан уус-уран киинэни устуу боппуруостарын дьүүллэстилэр.
Маны таһынан Ил Дархан “Кэриэстэбил вахтата. Ржев – Уһук Илин. Болдьоҕо суох: кэлэр кэм туһугар ааспыт кэм уруоктара” бырайыак туһунан кэпсэттилэр. Аан бастакытын Донецкай Норуодунай Өрөспүүбүлүкэ бэрэстэбиитэллэрэ көрдүүр үлэлэргэ 2023 сылга кыттыспыттара. Быйыл мантан 17 сайаапка киирбит. Айсен Николаев Донецкай Норуоттар Өрөспүүбүлүкэтин орто анал үөрэҕин кыһаларыгар Уһук Илин устудьуоннарын кытыннаран тематическай тэрээһиннэри ыытар наадалааҕын ыйда.
Көрсүһүү кэмигэр Денис Пушилин Саха сирэ Донецкай Норуодунай Өрөспүүбүлүкэ нэһилиэнньэлээх пууннарын чөлүгэр түһэрэр үлэлэргэ анаан-минээн тохтоото. 2022 сылтан өрөспүүбүлүкэ 137 эбийиэги Донбасска чөлүгэр түһэрбит. Быйыл Докучаевскайга спорткомплексы уонна салҕааһынын сөргүтэн киллэрбиттэр. Ону таһынан 3 мемориальнай эбийиэги сөргүппүттэр. Өссө да сэттэ эбийиэккэ үлэ барар.
Эрэгийиэн баһылыга Кировскай уонна Докучаевскай куорат олохтоохторун ааттарыттан Саха Өрөспүүбүлүкэтигэр махталларын тиэртэ. Бу туһунан Ил Дархан, бырабыыталыстыба пресс-сулууспата иһитиннэрэр.
Хаартыска Андрей Сорокин, ЯСИА
-
1
-
0
-
0
-
0
-
0
-
0
