Ол эрээри, муодунай оонньууру утарар төрөппүттэр эмиэ бааллар. Кутталлаах оонньуурдартан хайдах көмүскэниэххэ уонна ханна үҥсүөххэ сөбүй? Судаарыстыба оонньуур монстырдары утары хайдах охсуһарый уонна оҕо оонньуурун туһунан сокуону ылынар былааннаах дуо? Бу туһунан «Российская Газета» хаһыакка Судаарыстыбаннай Дуума Бэрэссэдээтэлин дьиэ кэргэни көмүскээһиҥҥэ бастакы солбуйааччы Татьяна Буцкая кэпсээбитин ааҕаччыбар тиэрдэбин.
-- Төрөппүт кутталлаах оонньуурга Роспотребнадзорга үҥсэр толору бырааптаах. Ол гынан баран, бу тэрилтэ оонньууру оҕо эт-хаан доруобуйатыгар кутталлааҕын эрэ өттүнэн сыаналыыр. Тоҕо диэтэххэ, сэртипикээссийэ оонньуур туох, хайдах түүттэн оҥоһуллубутун, бытархай чаастара эрэллээхтик сыһыарыллыбыттарын, иҥиннэриллибиттэрин, күүстээх синтетичэскэй сыттар, фенол курдук буортулаах вещество баарын-суоҕун эрэ сыаналыыр кыахтаах, – диэн дьокутаат быһаарда.
Госдуума дьокутаата этэринэн, оонньуур уйулҕа өттүнэн кутталын психологическай-педагогическай эспэртиисэҕэ судаарыстыбаннай стандарт (ГОСТ) оҥоһулуннаҕына эрэ сыаналыыр кыах баар буолуоҕа. Билигин ону оҥоруунан Роскачество дьарыктанар.
-- Бу ГОСТ быһаарыытын сүнньүнэн «сөптөөх оонньуурдар» туһунан сокуон ылыллыаҕа. Онуоха диэри оонньуур оҕо уйулҕатыгар кутталын быһаарар, сыаналыыр эппиэтинэс төрөппүккэ сүктэриллэр. Туох да диэбит иһин, син биир төрөппүт бу оонньууру тоҕо атыылаһарын бэйэтэ билэр, онон оҕотугар туох кутталааҕын толкуйдуохтаах, – диир Татьяна Буцкая.
Бу күҥҥэ дьокутааттарга төрөппүттэртэн саҥа монстрикка үҥсүү киирэ илик, ол эрээри төрөппүттэр Лабубу ыарахан сыаналааҕын тоһоҕолоон бэлиэтииллэр:
-- Төрөппүттэр оонньуур сыанатыттан соһуйаллар, оҕо табаарын быыһыгар атыылыылларын дьиибэргииллэр. Ханнык баҕарар төрөппүт оҕо маҕаһыыннарыгар уонна маркетплейстарга оҕотугар куттала суох оонньуурдар атыыланалларыгар эрэллээх буолуон баҕарар, – диэтэ дьокутаат.
Кини үгүс төрөппүт толкуйа суох мээнэ муоданы батыспатыгар эрэллээх:
-- Лабубу – бу муода элэмиэнэ. Муода куруутун тугу эмит киллэрэн уопсастыбаҕа соҥнуур. Биһиги эдэр эрдэхпитинэ банан-бүрүүкэ, варенка-джинсы муодата этэ. Муоданы эккирэтэрбитин (варенканы, уһуктаах түүпүлэни кэтэбит дуу, суумкабытыгар монстыры иилинэбит дуу) бэйэбит эрэ быһаарабыт.
Иһитиннэрии уонна хаартыска РГ: https://t.me/rgrunews
-
0
-
0
-
0
-
0
-
0
-
0
