- Нерюнгри олохтоохторо олус көтөҕүллэн ылыстылар диэн бэлиэтиэххэ сөп. Билигин бу пресс-подход кэмигэр уратыбыт элбэх диэн этэн аһардылар, ол сөп. Нерюнгрига бэйэлэрэ туспа олоҕурбут култууралаах элбэх омук тоҕуоруһан олорор. Ол иһин диэххэ сөп, кинилэр биһиги култуурабытыгар убамматах, билсибэтэх буолан, бастаан Олоҥхо ыһыаҕын тэрээһин үлэтин саҕалыырбытыгар уустук соҕус этэ. Онон сиэттэрэн биһиги өрөспүүбүлүкэтээҕи Олоҥхо Ыһыаҕын тэрийэр хамыыһыйата олохтоохтору бу үлэҕэ сыһыарар сорук туруоруммута. Ол курдук Нерюнгри олохтоохторун ыалдьыт эрэ быһыытынан буолбакка, бэйэлэрэ Олоҥхо ыһыаҕын өйдөрүнэн-санааларынан ылынан, тылларынан-өстөрүнэн, үлэлэринэн, дьайыыларынан тэрийээччи курдук сананалларын ситиһэргэ, төрүт култуурабатыгар сыһыарарга дьулуспуппут. Онуохаҕа туһааннаах кэпсэтиилэр, көрсүһүүлэр ыытылыннылар, анал кэмпириэнсийэ, семинардар, төгүрүк остуоллар тэрилиннилэр, кэлэктииптэри кытта үлэ барда. Ол түмүгэр нерюнгрилар биһиги төрүт култуурабатыгар олус чугаһаатылар, ылыннылар. Онно улахан үлэни Нерюнгри оройуонун баһылыга Роман Михайлович Щегольняк ыытта. Кини хас биирдии түгэҥҥэ ымпыгар-чымпыгар тиийэ туоһулаһан, үөрэтэн, кэпсэтэн, үлэлэһэн кэллэ. Холобура, Ыһыаҕы кытта сыһыаннаах элбэх сахалыы тиэрминнэри иҥэн-тоҥон үөрэттэ. Бэл, Ытык Дуоҕа диэн тылтан саҕалаан, өйдөбүллэр суолталарын үөрэтэн, сахалыы саҥаран да көрдө. Ыһыах түһүлгэтин тутууларын, тэриллэрин, саламатыгар тиийэ бэйэтэ хаама сылдьан ыйан, көрдөрөн биэрдэ, барытын хонтуруолга тута сылдьар, үтүө холобуру көрдөрдө. Онон Нерюнгрига Олоҥхо Ыһыаҕа стиһиилээхтик барарыгар эрэллээхпин!
Хаартыска Галина Бочкарева түһэриилэрэ
-
3
-
0
-
0
-
0
-
0
-
0
