Үгэс быһыытынан Үс Хатыҥ алгыстаах түһүлгэтигэр Алгыс уонна Кымыс иһиитин сиэрэ-туома толорулунна. Аһыллыы үөрүүлээх чааһыгар саха сценическэй үҥкүүтүн төрүттээччи, норуот ырыаһыта, олоҥхоһут Сергей Зверев-Кыыл Уола төрөөбүтэ 125 сылын уонна уһулуччулаах судаарыстыбаннай уонна бэлитиичэскэй диэйэтэл Гавриил Чиряев төрөөбүтэ 100 сылын бэлиэтээтилэр. Ол курдук, 1943 сыллаахха бу икки саха чулуу уолаттара Аҕа дойду Улуу сэриитигэр кытта баран иһэн «Краснояров» теплоходка көрсүспүт түгэннэрэ ойууланна. Бу бэлиэ түгэн хас биирдии киһиэхэ өбүгэлэрин хорсун быһыыларын, көлүөнэлэр быстыбат ситимнэрин санатта. Онтон Кыыл Уола туруоруутугар номоххо киирбит «Оһуор» үҥкүүнү Сунтаар улууһун үҥкүүһүттэрэ толороннор тоҕуоруһа мустубут дьон сүргэтин көтөхтүлэр.
4
СӨ Ил Дархана Айсен Николаев эҕэрдэ тылыгар Ыһыах өйдөбүнньүк, сомоҕолоһуу уонна кыайыыга итэҕэл бэлиэтин быһыытынан суолтатын тоһоҕолоото:
-- Бу Ыһыаҕы Улуу Кыайыыга аныыбыт уонна дьоруойдар көлүөнэлэригэр сүгүрүйэрбитин биллэрэбит. Бүгүн биһиги дойдубутун көмүскүү сылдьар буойуттарбытын кытта дууһалыын, санаалыын бииргэбит. Сотору бу түһүлгэҕэ Кыайыы оһуохайын үҥкүүлүөхпүт диэн итэҕэйэбин.
Сиэри-туому, оҕо уонна успуорт тэрээһиннэрин, быыстапкалары, кэнсиэртэри уонна үгэс буолбут куонкурустары киллэрэн туран, 100-тэн тахса саха норуотун уратытын көрдөрөр дьаһаллар ыытылыннылар, бастыҥнар билиннилэр.
Улуу Туймаада Үрүҥ Тунах Ыһыаҕын Антонина Неустроева уонна Владимир Григорьев хаартыскаҕа түһэрэн үйэтиппит түгэннэрин көрүҥ...
Антонина НЕУСТРОЕВА.
-
1
-
0
-
0
-
0
-
0
-
0
