Ол эрээри, саха сиэригэр сөп түбэспэт биир көстүүнү дьон бэркэ сүөргүлээбит. Биир эдэр дьахтар ыһыахха ытын киэргэтэн аҕалбытын, аньыырҕаабакка, кыыс оҕо таҥаһын таҥыннарбытын, симэҕин кэтэрдибитин туһунан бассаап сарсыардаттан оргуйан олордо.
Суруйааччы Ульяна Босикова – Сыгына маннык эттэ:
-- Сылгыны уонна ынаҕы Үрдүкү Айыылар түһэрбиттэрэ диэн өбүгэлэрбит маанылыыллара, оттон ыты алларааттан, абааһы дойдутуттан, тахсыбыта диэннэр ыһыахха төрүт киллэрбэт этилэр. Ыты ыһыах күн баайан кэбиһэллэрэ, онон Ыһыах ытык түһүлгэтигэр ыты аҕалыы, өссө итинник киэргэтии аньыы! Ыттаах киһини түһүлгэҕэ төрүт киллэримиэххэ, өссө улахан соҕустук ыстарааптыахха наада.
Билигин ханна даҕаны ыһыаҕы ыһыы култуурата сайдан, тупсан, төрүт сиэргэ-туомҥа болҕомто ууруллар, алгыс ситэри оҥоһуллар буолла. Өссө даҕаны байытыллан иһиэ турдаҕа. Дьэ оннук кэмҥэ, куһаҕан холобур үтүктээйилээх буолбатын -- ыты түһүлгэҕэ, өссө итинник симээн киллэрии курдук сүөргү көстүү аны хатыламматын!
-
69
-
0
-
2
-
3
-
3
-
28
