Өймөкөөн, Абый улуустарыгар эрэгийиэннээҕи ыксаллаах быһыы-майгы салгыы дьайар, Муома улууһугар үрдүкү бэлэм буолуу эрэсиимэ салҕанар, ону тэҥэ бу 3 улууска быыһыыр, чөлүгэр үлэлэр ыытыллаллар. Ол туһунан кырасдааныскай көмүскэлгэ уонна нэһилиэнньэ олоҕор-дьаһаҕар куттала суох буолууну хааччыйыыга миниистири бастакы солбуйааччы Айаал Вензель иһитиннэрдэ.
От ыйын 20 күнүгэр Өймөкөөн, Абьый улуустарыгар холбоон 96 тиэргэн билигин да ууттан босхолоно иликтэр. Муома улууһугар уу ылбыт тиэргэннэриттэн барыларыттан барда.
Суукка иһигэр Өймөкөөҥҥө уу 4-тэн 26 см. тиийэ түстэ, Абыйга 26 см. түстэ, Муомаҕа куттааллаах кирбииттэн алын түстэ.
Халаан уутуттан эмсэҕэлээбит улуустарга билигин быыһыыр, чөлүгэр түһэрии үлэтигэр 104 киһи, 43 тиэхиньикэ үлэлиир. 19 киһилээх, 16 тиэхиньикэлээх суолу оҥорор биригээдэлэр өрөмүөннүүр үлэлэри оҥоро тахсарга бэлэмнэр.
-Быһыы-майгы билигин хонтуруолланар, суһал сулууспалар үрдүкү бэлэм буолуу эрэсииминэн үлэлииллэр. Эмсэҕэлээбит улуустарга хоромуньуну ааҕы салҕанар, -диэн Айаал Вензель бэлиэтиир.
Өймөкөөҥҥө уу түһээтин кытта Томтор, Куйдуһун олохтоохторо уонна «Сахаэнерго» тэрилтэ үлэһиттэрэ дьаныардаахтык үлэлээн, Куйдуһуҥҥа туоруур суолу оҥордулар.
«Онон вездеходунан икки сиринэн туоруур кыах үөскээтэ. Куйдуһун сапыраапкатыттан наадыйар дьон уматыгы кэниистэрэнэн ылыахтарын сөп буолла», — диэн Томтор нэһилиэгин баһылыга Алексей Винокуров иһитиннэрдэ.
Хаартыска Саха гов
-
2
-
0
-
0
-
0
-
0
-
0
