Муораҕа тахсарга стратегическай суолталаах, Арассыыйа Балтийскай флотун баазата манна баар, онон байыаннай хараабыллар элбэхтэр. Аатырбыт «Титаник» киинэҕэ уһуллубут, Атлантическай акыйаан түгэҕэр тимирэ сытар икки аҥы хайа барбыт хараабыл куорпуһун устаары киирэ сылдьыбыт «Мир» батискаф билигин түмэлгэ дьон көрүүтүгэр турар.
Гид кэпсииринэн, Джеймс Кэмерон киинэтин устан баран акыйаан түгэҕэр киирэр тиэхиньикэни уларсыбыттарын иһин махтанан туран, «Титаник» премьератын аан бастаан Калининградка көрдөрбүт.
Төгүрүк быһыылаах батискаф көрдөххө дьоҕус курдук эрээри, 18 туонналаах тиэхиньикэ Атлантическай, Чуумпу, Индийскэй акыйааҥҥа үгүс эспэдииссийэлэргэ сылдьыбыта, «Курскай» уу аннынан устар аал саахалын туоратарга үлэлэспитэ, Байкал күөлү тиийэ чинчийбит сүдү кыахтаах тэрил. Ону таһынан, «Мир» Хотугу полюска 4,3 тыһ. миэтэрэ дириҥнээх байҕал түгэҕин булан, титантан кутуллубут Арассыыйа былааҕын хаалларан, Гиннес рекордугар киирбитэ.
Мусуойга киһи сөҕө-махтайа көрөрө: кит балык сүрэҕэ, аҥаардас хаанын хачайдыыр биир уоргана боруода ынахтан быдан улахан, 700 киилэлээх эбит. 16 миэтэрэ уһуннаах, хаһааҥҥыта эрэ 2,5 туонна ыйааһыннаах кашалот уҥуоҕа былыргы динозавр курдук үөһэттэн сабардаан турар. Түмэлгэ аан дойду байҕалын дириҥин, сүүрүгүн, салгынын баттааһынын, хамсыыр харамайын үөрэтэр тэрил арааһа, водолазтар таҥастара быыстапкаҕа кэчигирэһэн тураллар.
Ааптар хаартыската.
-
0
-
0
-
0
-
0
-
0
-
0
