Хайа төһө үрдүгэ ыраахтан көстөр диэн этэллэр, ол курдук Михаил Ефимович төрөөбүт сахатын омугар төһө ураты дириҥ суолталаах, инники кэскили быһаарар ураты дьайыылары, үтүө дьыалалары оҥорбута күн-дьыл аастааҕын аайы ордук дьэҥкэтик дьэрэлийэн көстүөхтэрэ, бар дьонун сүгүрүйүүтүн ылыахтара! Кини олоҕун кэрчиктэрэ - уһулуччулаах ситиһиилэрэ, кэннинэн кэхтибэт туруулаһыылара, улахан охсуулары уйуута, элбэх таҥнарыыны тулуйуута, барыта биһиги харахпыт иһинэн ааспыттара! Омукпут биир быһаарыылаах кэрдиис кэмигэр биһиги маннык үөһэттэн ананан кэлбит салайааччыламмыппыт, кини түмпүт биир санаалаах, үрдүк таһымнаах хамаандата Михаил Ефимович таһыгар биир ньыгыл кэккэнэн турбута биһиги дьолбут буолар! Онон биһиэхэ, саха дьонугар, бүгүн сырдык курус санаалаах Кутурҕан күнэ!
Сырдык аатыгар сүгүрүйэн
Ытык киһибит сырдык аатыгар сүгүрүйэн Өктөмҥө биир кэлим уопсастыбаннай туона тутуллаары турарын туһунан Ил Дархан Айсен Николаев «Якутия 24» тэлэбиидэнньэ ханаалын «Якутия, вперёд!» биэриитигэр этэн турар.
Бу комплекс Михаил Ефимович көмүс уҥуоҕа харалла сытар сирин уонна Наукалар дьоҕус академиялара, Николаев-центр, былыргы оскуола, Троицкай таҥара дьиэтэ курдук эбийиэктэри биир ситимҥэ киллэриэҕэ.
Санатар буоллахха, Ил Дархан Айсен Николаев Бастакы Бэрэсидьиэн сырдык аатын үйэтитэргэ таһаарбыт ыйааҕын чэрчитинэн биллэриллибит Бүтүн Арассыыйатааҕы архитектурнай куонкурус кыайыылааҕынан архитектор Иван Кычкин салайааччылаах «Градо» айар бөлөх тахсан турар. Бырайыакка стела, амфитыйаатыр, кэпсиир-көрдөрөр истиэндэлэр бааллар. Бырайыак олоххо киирэрэ быһаарылыннаҕына, тутуу быйылгыттан саҕаланан, сүрүн өттө 2026 сылга үлэҕэ киириэн сөп.
Оттон Дьокуускай куоракка Михаил Николаевка пааматынньык туруохтаах. Пааматынньыкка анаан куорат ипподромуттан чугас миэстэ ананан турар. Күрэх кыайыылааҕа балаҕан ыйын диэки биллиэҕэ. Оттон тутуу 2026 сылтан саҕаланыаҕа.
Айсен Николаев бэлиэтээбитинэн, Михаил Ефимович Николаев сырдык аатын үйэтитэр тэрээһиннэри тус хонтуруолугар тутар, диэн Ил Дархан уонна Бырабыыталыстыба пресс-сулууспата иһитиннэрэр.
Хаартыска: Андрей Сорокин, СИА
-
0
-
0
-
0
-
0
-
2
-
0
