Бэҕэһээ Ил Дархан Айсен Николаев тыа хаһаайыстыбатын министиэристибэтин салалтатын кытары көрсөн, оттооһун хаамыытын туһунан мунньахтаата. Тыа хаһаайыстыбатын уонна ас-үөл бэлиитикэтин миниистирэ Артем Александров иһитиннэрбитинэн, атырдьах ыйын 4 күнүнээҕи туругунан, күөх быйаҥ күрэҕэр 23 168 отчут, 9 914 араас мааркалаах тыраахтар, 8 879 звено, ол иһигэр 3 246 толору мэхэньисээссийэлээх, 3 510 ситэтэ суох мэхэньисээссийэлээх, 62 көлө, 2000 илии звенолара тахсан, оттуу сылдьаллар. Барыта 122 982 гектар иэннээх ходуһа сирэ охсуллан, 118 425 туонна от кэбиһиллибит (ол иһигэр, мобильнай биригээдэлэр 3 687 туоннаны оттообуттар). Бу – кыстыыр от 27 %-а. Ону таһынан 600 туонна сиилэс угуллубут, 35 туонна сенаж оҥоһуллубут. Видеокэмпириэнсийэ киэбинэн улуустар баһылыктара отоһун хаамыытын билиһиннэрдилэр.
– Сорох улуустар көрдөрүүлэрэ үрдүк буоллаҕына, кэккэ улуустарга намыһах, ити үлэ тэтимэ бытаанын көрдөрөр. Бу хаалбыт кэмҥэ бары күүһү түмүнэн, сүөһү аһылыгын бэлэмнээһин үлэтин күүһүрдүөххэ наада, – диэтэ Айсен Николаев.
Халаан уутуттан эмсэҕэлээбит Өймөкөөн уонна Муома улуустарыгар ураты болҕомтону уурарга, ходуһалартан ууну түһэрии үлэтин күүһүрдэргэ эттэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Хаартыска: Андрей Сорокин (ЯСИА) түһэриитэ.
-
0
-
0
-
0
-
0
-
0
-
0
