Саха Сирин Киин быыбар хамыыһыйатын бэрэссэдээтэлэ Евгений Федоров иһитиннэрэринэн, быйылгы быыбар балачча күрэстэһиилээх буолар чинчилээх. Улуус баһылыгын дуоһунаһыгар 3-7 хандьыдаат, нэһилиэк баһылыгар ортотунан 2-3 киһи дураһыйарын биллэрбит. Уус Алдан улууһун баһылыгар билиҥҥитэ саамай элбэх – 7 киһи, Хаҥалас – 6, Өлөөн – 7 уонна Сунтаар – 3 киһи эрэгэстэрээссийэлэммит. Мииринэй Айхал бөһүөлэгин баһылыгар 7 киһи турбут, Хаҥалас киинин Покровскай куорат – 6, Алдан куорат баһылыгар 5 хандьыдаат киирсэр буолбуттар.
Салайар дуоһунаска баартыйаларынан ылан көрдөххө, «Биир Ньыгыл Арассыыйа» баартыйаттан 945, бэйэ туруорунан – 630, «Сиэрдээх Арассыыйа-Патриоттар-Кырдьык иһин» – 79, КПРФ – 72, ЛДПР – 51, «Саҥа дьон» – 42, «Ийэ дойду» – 1, «Арассыыйа коммунистара» баартыйаттан – 1 киһи турбут.
Саамай эдэр саастаах хандьыдааттар, 21-23 саастаахтар, нэһилиэк баһылыгар уонна дьокутаатыгар, оттон саамай аҕам саастаахтара – 71-дээх киһи Горнай улууһун Кировскай нэһилиэгин баһылыгар турбут.
Балаҕан ыйын 14 күнүгэр ыытыллар олохтоох салайыныы уорганнарыгар быыбардыыр күн кэккэ биричиинэнэн бу күн суох буолар дьон эрдэ куоластыахтарын сөп. Эрдэ куоластааhын болдьоҕо: быыбар буолуон 10 күн иннинэ ыытыллар. Ол эбэтэр балаҕан ыйын 3 күнүттэн балаҕан 13 чыыhылатыгар диэри. Бу күннэргэ кэлэн үлэ күнүгэр 16.00 ч — 20.00 ч, өрөбүл күн сарсыарда 10.00 ч — 16.00 ч диэри куоластыаххытын сөп.
Балаҕан ыйын 14 күнүгэр быыбар сарсыарда 08.00 ч. — 20.00 ч. диэри ыытыллар.
Хаартыска Саха Сиринээҕи ТИК саайтыттан
-
1
-
0
-
0
-
0
-
0
-
0
