Губинскай уокурук быраабата сыл ахсын көҕөрдүүнэн дьарыктанар тэрилтэлэри кытта кэпсэтэн, тула өттө хатыҥнардаах, араас сэппэрээк мастардаах искибиэргэ сибэкки арааһын олордоллор. Кыһыл, маҥан, араҕас, оруосабай дьүһүннээх сибэкки хойуута, өлгөмө, эгэлгэтэ элбэҕэ киһи эрэ хараҕын үөрдэр, сүрэҕин манньытар. Сибэкки быыһыгар, хатыҥнар күлүктэригэр ыскамыайкаҕа кыра оҕолоох ийэлэр, куорат олохтоохторо сөбүлээн сынньаналлар.
Сиккиэр тыалга муора долгунун курдук долгулдьуйа турар тыһыынчанан сибэккини олордор, өҥүрүк куйааска ууну кутар, көрө-истэ сылдьар бэйэтэ туһунан кичэллээх үлэ түмүгэ.
Нюргуяна Викторовна Андреева, Аартыкатааҕы судаарыстыбаннай агротехнологическай үнүбүрсүөт (АГАТУ) ойуур уонна сири оҥоруу бакылтыатын «Сири оҥоруу уонна ландшафнай архитектура» хаапыдыратын ыстаарсай преподавателэ «Туймаада саллаата» искибиэргэ сибэккини олордууга үлэни сүрүннүүр салайааччы бачча элбэх үүнээйини хайдах олордубуттарын туһунан кэпсээтэ.
– Быйыл биһиги үөрэхпит кыһата куорат дьаһалтата ыытар тиэндэригэр кыайыылааҕынан биллэриллэн, Кыайыы болуоссатыгар, «Туймаада саллаата» искибиэргэ, Сыырка искибиэригэр, Бекетов пааматынньыгар уонна мээрийэ аттыгар, Ленин проспегар, Московскай искибиэргэ турар вазоннарга араас сибэккилэри бэйэбит агрономия уонна химия хаапыдырата үүннэрбит рассадаларынан олортубут.
Ити этиллибит искибиэрдэри көҕөрдүү үлэтэ тус-туһунан хаапыдыраларынан үллэриллибитэ. Эбийиэктэри көҕөрдүүгэ салайааччыбыт агрономия уонна химия хаапыдыратын дассыана, тыа хаһаайыстыбатын билимин хандьыдаата Василий Васильевич Чичигинаров салайыытынан сибэкки олордуллуон иннинэ буора уларытыллыбыта, тупсарыллыбыта. Сайын устата сибэкки иинэн-хатан хаалбатын туһугар уоҕурдуунан эбии аһатабыт, билигин даҕаны илиибитин араарбакка көрө-истэ сылдьабыт.
«Туймаада саллаата» искибиэргэ биһиги хаапыдырабыт преподавателлэрэ уонна устудьуоннара буолан 8666 сибэкки арааһын олордон, сайын устата көрдүбүт.
Быйыл тиэндэр докумуонугар көҕөрдүүгэ Дьокуускай куорат баһылыгын сүбэһитэ Екатерина Олеговна Павлова үлэһиттэрин кытта тиэхиньиичэскэй сорудах оҥорон биэрбиттэрэ. Онно хас биирдии учаастакка хас сибэкки, ханнык суортаах олордуллуохтааҕа дьүһүнүгэр тиийэ ыйыллыбыт этэ. Бэс ыйын саҕаланыаҕыттан балаҕан ыйа бүтүөр диэри ханнык уоҕурдуу кутуллара, буорун бэлэмнээһинэ эмиэ кэмнээх-кэрдиилээх, — диэн этэр Нюргуяна Викторовна.
Үүнээйи олордуллуон иннинэ АГАТУ кылаабынай инженерэ Александр Сергеевич Соколов үлэһиттэри кытта уу сүүрэр турбатын тардан, араас тэрилтэлэри кытта алтыһарга докумуоннарын бэлэмнээн биэрбиттэрэ.
«Туймаада саллаата» искибиэргэ араас өҥнөөх, суортаах петуния, бархатцы, алиссум, циннерария сибэккилэр киэркэйэллэр, туймаардар сыттара ыраахтан дыргыйар.
«Быйыл Улуу Кыайыы 80 сылыгар тиэхиньиичэскэй сорудах быһыытынан, искибиэргэ саха снайперын пааматынньыгын аттыгар кыһыл петуниянан сулус олордубуппут уонна кытыытын циннерария сибэккинэн киэргэппиппит.
Хаапыдырабыт устудьуоннара үөрэхтэрин бүтэрдэхтэринэ ландшафтнай архитектор, сири оҥорооччу, кадастровай инженер буолуохтара, кинилэр быраактыкаларын кэмигэр сайын устата ууну куттулар, преподавателлэри кытта сыыс отун ыраастаан, сири уоҕурдан биэрдилэр. Көстүүтэ үчүгэй буоларыгар олус сыралаах, көрүүлээх үлэни ыыттыбыт», — диэн Нюргуяна Андреева санаатын үллэстэр.
Урукку сылларга хаапыдыра сэбиэдиссэйэ, дассыан, архитектура билимин хандьыдаата Айталина Анисимовна Старостина салайыытынан «Сири оҥоруу уонна ландшафтнай архитектура» хаапыдыратын үлэһиттэрэ, устудьуоннар газон, мас олордуутугар хас даҕаны эбийиэктэргэ үлэлээбиттэрэ. Хаҥалас улууһугар Билим дьоҕус академиятыгар, Горнай улууһугар С.П. Данилов аатынан Бэрдьигэстээх орто оскуолатыгар, Лонгинов аатынан Атамай орто оскуолатыгар итиэннэ Бэрдьигэстээххэ бырааттыы Даниловтар искибиэрдэрин сибэккинэн, күөх үүнээйинэн силигин ситэрэн, көстүүтүн тупсаран биэрбиттэрэ. Маны таһынан, хаһыс да сылларын Киров уулуссатыгар турар «Алмаасэргиэнбаан» офиһын палисаднигар сибэкки, мас олордубуттара.
Ону таһынан, быйыл «Сири оҥоруу уонна ландшафнай архитектура» хаапыдыратын бастакы, иккис куурсун устудьуоннара хаапыдыра сэбиэдиссэйэ Татьяна Николаевна Федорова салайыытынан АГАТУ тиэргэнин сибэкки арааһынан киэргэттилэр.
Ити курдук куораппыт сыл ахсын сибэккитэ элбээн, тупсан, киэркэйэн иһэрэ киһи эрэ сүргэтин көтөҕөр, дууһатын үөрдэр.
Ааптар хаартыскаҕа түһэриилэрэ.
-
0
-
2
-
0
-
0
-
0
-
0
