Олохтоох бэйэни салайыныы бэрэстэбиитэллээх уорганын, Дьокуускай куорат мунньаҕын бэрэссэдээтэлин солбуйааччы Феликс Романов куораты тоҕо таптыырын, олорор сирбитин тупсарарга туох үлэ ыытылларан туһунан санаатын үллэһиннэ.
Феликс Игоревич эдэр дьокутааттартан биирдэстэрэ, кини отутун туолуон иннинэ Строительнай уокуруктан дьокутаатынан талыллыбыта, билигин иккис ыҥырыыга үлэлиир, идэтинэн инженер-мэхээнньик, СӨ анал сибээскэ управлениетын начаалынньыга.
— Оҕо сааһым сырдык өйдөбүлүнэн үгүс дьон дьоллоох Дьокуускай куоракка дьоллорун булаары, үчүгэй олоххо тардыһан кэлэллэрэ. Подъезка оҕо күлүүтэ чугдаарара, дойду араас муннугуттан кэлбит ыаллар биир иллээх дьиэ кэргэн курдук олороллоро. Билиҥҥи курдук уопсастыбаннай эйгэни тупсарарга үп-харчы көрүллүбэт этэ.
Дьокуускай сыл ахсын үүнэн-сайдан, тупсан-киэркэйэн иһэр, киин проспегы, Өрөспүүбүлүкэ болуоссатын саҥардыбыттарын кэннэ светомузыкальнай фонтаны көрөөрү элбэх киһи тоҕуоруһар буолла.
Куораппын дьоно-сэргэтэ эйэҕэс-сайаҕас майгылааҕын, табыгастаах логистикалааҕын уонна биир күн иһигэр хас да дьыаланы ситиһиэххэ сөбүн иһин сөбүлүүбүн.
Үүнэр көлүөнэ Дьокуускайтан атын куораттарга бара сатаабатын, дойдутугар хааларын туһугар күүстээх үлэ ыытыллыахтаах. Төһө даҕаны тымныы-тыйыс айылҕалаах сиргэ олордорбут, дьон иллэҥ кэмин туһалаахтык атаарарыгар тупсаҕай уопсастыбаннай эйгэ арааһа тэриллиэхтээх. Сайыҥҥы кэмҥэ биир сүрүн кыһалҕа бурҕайа турар быылы хаптатыы, бу саамай тыын боппуруос дии саныыбын, - диэн этэр кини.
Ол туһунан сиһилии "Ил Түмэн" хаһыат кэлэр нүөмэригэр ааҕыҥ.
Хаартыска Феликс Романов + эрэдээксийэ архыыбыттан.
-
0
-
0
-
0
-
0
-
0
-
0
