Сүбэ мунньахха Бырабыыталыстыба Бэрэссэдээтэлин солбуйааччы Георгий Степанов, норуот дьокутаата Елена Голомарева, министиэристибэлэр, биэдэмистибэлэр бэрэстэбиитэллэрэ, тустаах улуустар баһылыктара кытыннылар.
Аартыка олохтоохторугар дохуоту үрдэтии итиэннэ социальнай мэктиэлэр тустарынан боппуруоска дакылааттары үлэ уонна социальнай сайдыы миниистирэ Елена Волкова, үп миниистирин э.т. Иван Алексеев, экэниэмикэ миниистирэ Петр Попов, Арассыыйа Социальнай пуондатын Саха Сиринээҕи салаатын салайааччы Марк Унаров оҥордулар. Ураты болҕомто хамнаска оройуоннааҕы коэффициены уонна бырыһыанынан эбиилиги киллэрэн туран, нэһилиэнньэ дохуотун үрдэтии кэлим дьаһалларыгар уурулунна. Ону сэргэ олох-дьаһах туруктаах буолуутун хааччыйыыга улахан оруоллаах хайысхалар, биэнсийэнэн хааччыйыы уонна хамнас алын кээмэйин мэктиэтин тутуһуу, боппуруостара ырытылынна.
Каадырынан хааччыллыы уонна нэһилиэнньэ дьарыктаах буолуутун хайысхатыгар иһитиннэриилэри Нэһилиэнньэ дьарыктаах буолуутугар судаарыстыбаннай кэмитиэт бэрэссэдээтэлэ Светлана Горюшинская, доруобуйа харыстабылын миниистирэ Лена Афанасьева, үөрэх уонна билим миниистирин бастакы солбуйааччы Ньургун Павлов, М.К. Аммосов аатынан ХИФУ ректора, Ил Түмэн дьокутаата Анатолий Николаев оҥордулар. Аартыка экэниэмикэтин сүрүн салааларыгар уонна социальнай эйгэтигэр исписэлиистэри тардарга, олохсутан үлэлэтэргэ туһаайыллыбыт «Үлэлиир Саха Сирэ. Каадырдар» бырайыак тула киэҥ кэпсэтии таҕыста. Аартыка улуустарыгар үлэлиир бөдөҥ тэрилтэлэри кытары үс өрүттээх дуогабардары түһэрсии үлэтэ көдьүүстээхтик ыытыллара бэлиэтэннэ. Дьыл кэминэн быстах үлэнэн хааччыйыы, уопсастыбаҕа туһалаах үлэни тэрийии итиэннэ урбаанньыттарга көмөлөһүү бырагыраамалара олохтоохтору үлэнэн хааччыйарга төһүү буолара этилиннэ.
Дьиэ кэргэни өйөөһүн уонна демография бэлиитикэтин боппуруостара умнуллубата. Бэрэсидьиэн Владимир Путин көҕүлээһининэн оҥоһуллубут «Дьиэ кэргэн» национальнай бырайыак иһинэн судаарыстыбанай бырагыраамалар таһаарыылаахтык үлэлииллэрэ сырдатылынна. Төрүт олохтох аҕыйах ахсааннаах хотугу норуоттары өйөөһүн чэрчитинэн, Үлэ уонна социальнай сайдыы министиэристибэтин кэрискэтигэр 2025 сыл тохсунньу 1 күнүнээҕи туругунан, 150 көс олохтох дьиэ кэргэн киллэриллибититтэн, 68 ыал Аартыка улуустарыгар олорор эбиттэр. Бу туһунан Ил Дархан уонна Бырабыыталыстыба пресс-киинэ суруйар.
Хаартыска: Бырабыыталыстыба саайтыттан.
-
0
-
0
-
0
-
0
-
0
-
0
