Болҕомто киинигэр хотугу омуктарга үгэс буолбут бултааһын быраабылаларын чопчулуур сокуон барыла туруорулунна. Бу сокуон барыла кыыл-сүөл бултанар көрүҥэ төһө баарын ааҕыы-суоттааһын бэрээдэгэ итиэннэ ону үчүгэйдик хонтуруоллааһын суоҕун, ону таһынан, көҥүлэ суох бултааһын кыыл-сүөл үөскээһинигэр суоһуурун учуоттаан оҥоһуллубута. Ил Түмэҥҥэ бастакы ааҕыыга ылыллыбыта, билигин салгыы чочуйууга сылдьар.
Сокуон барылыгар үгэс буолбут бултааһын территориятынан хотугу омуктар түөлбэлээн олорор уонна үгэс буолбут хаһаайыстыбаннай үлэнэн дьарыктанар сирдэрэ ааҕыллар. Лимиитинэн бултанар кыылларга көрүллэр кубуотаны тыырыы бэрээдэгэ олохтонор. Оттон хотугу норуот бэрэстэбиитэлэ буолбатах эрээри, үгэс буолбут хаһаайыстыбаннай үлэнэн дьарыктанар дьоҥҥо маннык бултааһыҥҥа быраап бэриллэр.
Андрей Находкин Арассыыйа Федерациятын Тыатын хаһаайыстыбатын министиэристибэтэ 2009 с. тохсунньу 20 күнүгэр таһаарбыт бирикээһинэн, хотугу омук бэрэстэбиитэллэрэ түөлбэлээн олорор нэһилиэнньэлээх пууннарын чэрчитин тас өттүгэр бултаатахтарына, ыстарааптаныахтарын сөбүн бэлиэтээн туран, бу боппуруос өрөспүүбүлүкэ таһымынан быһаарыллара наадатын эттэ. Онуоха сокуоҥҥа тустаах уларытыыны оҥорорго элбэх этиини киллэрэр ирдэнэрэ чуолкайданна. Онон боппуруоһу сотору кэминэн хаттаан көрөргө быһаарылынна диэн Ил Түмэн пресс-киинэ суруйар.
Хаартыска: Ил Түмэн саайтыттан.
-
0
-
0
-
0
-
0
-
0
-
0
