Дмитрий Илларионович Ягодкин Дьокуускайдааҕы көтөрү иитэр баабырыка бастакы дириэктэрэ, бу микрооройуон төрүттээччитэ уонна оскуоланы туруорсан астарбыт чаҕылхай салайааччы. Кини толкуйдаабыт толкуйунан, салайбыт санаатынан бу микрооройуоҥҥа Көтөр баабырыкатын курдук улахан тэрилтэ үлэһиттэрин оҕолоругар орто оскуола тутуллубута, онтон билигин ол оскуола кэҥэтиллэн, аныгылыы ирдэбилгэ эппиэттиир үөрэх кыһата буолла.
Кэскиллээх салайааччы микрооройуон сайдыытыгар баҕарбыта олохххо бүүс бүтүннүү киирдэ. Дмитрий Ягодкин аатынан оскуолаҕа саҥа олох сайдар саҕахтарыгар бүгүҥҥү ыччат үөрэнэр, сайдар. Аны бүгүн оскуола искибиэригэр куорат сайдыытыгар улахан кылаатын киллэрсибит Дмитрий Ягодкин аата иҥэрилиннэ.
Искибиэри аһыыга анаммыт миитиҥҥэ оскуола дириэктэрэ Алексей Иванов маннык эттэ:
– Дмитрий Илларионович толкуйдаабыта-былааннаабыта барыта олоххо киирдэ, онон, биһиги оскуола үөрэнээччилэрэ, төрөппүттэрэ, иитэрүөрэтэр кэлэктиибэ махталбыт бэлиэтигэр киниэхэ анаабыт искибиэрбит бүгүн оскуолабыт килбэйэр киинигэр тутуллан, дьоҥҥо-сэргэҕэ аанын аспытыттан улаханнык астынныбыт. Аан бастаан оҕолор харахтарынан уруһуй дьиҥнээх искибиэр буолан, өрөспүүбүлүкэ биир убаастанар киһитин Дмитрий Ягодкин аатын ааттаттын, бу микрооройуон хас биирдии олохтооҕо кини аатыгар сүгүрүйдүн.
Салгыы тылы «Дьокуускайдааҕы көтөр баабырыката» АУо генеральнай дириэктэрэ Наталья Дягилева ылар:
-- Биһиэхэ, көтөр баабырыкатын үлэһиттэригэр, микрооройуон олохтоохторугар бүгүн олус үөрүүлээх күн үүннэ. Ол курдук, биһиги убаастыыр салайааччыбыт Дмитрий Ягодкин аатынан искибиэр үлэҕэ киирдэ. Дмитрий Илларионович бэйэтэ баҕарбытын курдук, бу оскуола микрооройуоммут саамай киэн туттуутунан буолла. Былырыын тутуллубут оскуола салгыыта территориябытын өссө тупсарар, киэркэтэр. Оскуола кэлэктиибэ, үөрэнээччилэрэ, төрөппүттэрэ бары биир киһи курдук, Дмитрий Ягодкин аатын үйэтитэргэ үлэлииллэр, саҥаттан саҥа хамсааһыннары оҥороллор. Мин бүгүн, дьон-сэргэ ортотугар кинилэргэ махтанан тураммын, оскуола дириэктэригэр Алексей Ивановка махталбын тиэрдэбин.
Бу улахан хамсааһын чиэһигэр оскуола дириэктэрэ искибиэри тутууга сүүрбүт-көппүт, көмөлөспүт, өйөөбүт дьоҥҥо Махтал Суруктары туттартаата. Наҕараадаламмыттар истэригэр, бу искибиэр үлэҕэ киириитин тэрийбит Галина Ксенофонтова, Наталия Соловьева бааллар. Кинилэр дьаныардаах үлэлэринэн сквер аһыллыбытыгар улахан махтал буоллун!
Оскуола үөрэнээччилэрин төрөппүттэрин аатыттан Сардаана Аммосова, бэтэрээн үлэһит Мария Ларионова уо.д.а тыл эттилэр. Кинилэр бары бу искибиэр Дмитрий Ягодкин аатын ааттата турарыгар уонна дьон-сэргэ сүгүрүйэр сирэ буолуоҕар эрэллэрин эттилэр.
Искибиэр аалай лиэнтэтин быһыыга Дьокуускайдааҕы көтөр баабырыкатын генеральнай дириэктэрэ Наталья Дягилева, оскуола дириэктэрэ Алексей Иванов, төрөппүт Сардаана Аммосова ыҥырылыннылар. Кинилэр үлэһит киһи дьыалата өлбөт-сүппэт дьылҕалааҕын, хайа да үйэҕэ аата ааттанарын билэн тураннар, үтүө киһи, үтүө салайааччы Дмитрий Ягодкин аатынан искибиэр аанын астылар.
Искибиэргэ бастакы суолу Д.Ягодкинныын үлэ бастакы хардыыларын оҥорбут үлэ бэтэрээннэрэ, тэрилтэ олоххо көхтөөх позициялаах үлэһиттэр, микрооройуон олохтоохторо оҥордулар, мындыр, ырааҕы өтө көрбүт салайааччыларыгар сибэкки уурдулар.
Искибиэр үлэтин саҕалаата. Бу биллиилээх үлэһит биир дойдулаахпыт Д.И. Ягодкин аата ааттаннын, оҥорбут дьыалалара үйэ-саас тухары ахтылыннын!
Лариса Аввакумова,
Арассыыйа Суруналыыстарын сойууһун чилиэнэ.
-
1
-
1
-
0
-
0
-
0
-
0
