Ол курдук, «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэхтэһии кыайыылааҕа Бүрээт Өрөспүүбүлүкэтиттэн Улан Удэтээҕи национальнай лиссиэй-интэринээт учуутала Светлана Раданжапова, Калмыкия Өрөспүүбүлүкэтиттэн «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэх призера, Элиста куорат 24 №-дээх уһуйаанын эбии үөрэхтээһинин педагога Екатерина Балакаева кэлэллэрэ күүтүллэр.
Дэлэгээттэр саха тылын, литературатын уонна култууратын үүнэр көлүөнэбитигэр, кэлэр кэскилбитигэр тиэрдэр, сайыннарар туһугар этиилэри киллэриэхтэрэ. Сүрүн көтөҕүллэр боппуруостарынан буолуохтара: сахалыы иитии-үөрэтии билимин сайыннарыы, сахалыы тылынан иитэр-үөрэтэр усулуобуйаны үөрэх эйгэтигэр тэрийии, идэҕэ бэлэмниир үөрэх тэрилтэлэригэр саха тылын, литературатын уонна култууратын үөрэтэр усулуобуйаны тэрийии, тупсарыы, Олоҥхо педагогиката, аныгы ыалга оҕону сахалыы иитии, доруобуйаларыгар хааччахтаах оҕолорго төрөөбүт тылы үөрэтии уратыта, сахалыы үөрэтии хаачыстыбатын кэтээн көрүү, үрдэтии; куорат эйгэтигэр саха тылын үөрэтии кыһалҕатын уонна инникитин туһунан, саха тылын, литературатын, кэпсэтии тылын олимпиадатын туһунан, онтон да атын тыын боппуруостарга, тоҕоостоох тиэмэлэргэ төгүрүк остуоллар, санаа атастаһыылар ыытыллыахтара, иһитиннэриилэр буолуохтара, быыстапкалар тэриллиэхтэрэ. Дэлэгээттэр уонна сийиэһи тэрийээччилэр «Саха» көрдөрөр-иһитиннэрэр хампаанньа былаһааккаларыгар кыттыыны ылыахтара.
Сийиэс пленарнай мунньаҕа сарсын, ол эбэтэр сэтинньи 25 күнүгэр сарсыарда 9:00 чаастан П.А. Ойуунускай аатынан Саха академическэй тыйаатырыгар буолуоҕа. Мунньах бырагыраамата киэҥ. «Сахам тыла үүнэ-сайда турдун!» диэн саха тылын уонна литературатын учуобунньуктарын, көмө босуобуйалар, оҕоҕо аналлаах сахалыы кинигэлэр, методическай литературалар быыстапкалара тэриллиэҕэ. «Саха Өрөспүүбүлүкэтигэр судаарыстыбаннай уонна дьиҥ таһымнаах тыллары харыстааһын уонна сайыннарыы» диэн өрөспүүбүлүкэтээҕи судаарыстыбаннай бырагыраама чэрчитинэн, анал бырайыактары сырдатыы буолуоҕа.
Туспа бырагырааманнан Олоҥхо дэкээдэтин тэрээһиннэрэ ыытыллыахтара. С.Н.Донской-II аатынан Үөрэҕи сайыннарар уонна идэни үрдэтэр үнүстүүккэ «Учуутал мастарыскыайа» диэн бастыҥ учууталлар, иитээччилэр маастар-кылаастара ыытыллыахтара.
Ол иһигэр, сэтинньи 25 күнүгэр Саха Өрөспүүбүлүкэтин Билимин акадьыамыйатын Төрөөбүт тылы үөрэтэр, чинчийэр, сайыннарар кииҥҥэ (Ленин пр. 33 №-гэр) күнүс 15.00 чаастан «Сахалыы иитии-үөрэтии билимин сайыннарыы» тиэмэҕэ төгүрүк остуол ыытыллыаҕа. Онно дэлэгээттэр оскуолаҕа билим-чинчийэр хайысханы сайыннарыы, сахалыы үөрэтии-иитии мэтиэдьикэтинэн дьарыктанар учуонайдары бэлэмнээһин, чинчийиилэр түмүктэрин итиэннэ чинчийии түмүгүн үөрэх эйгэтигэр туһаныы уо.д.а. туһунан сэһэргэһиэхтэрэ, уопут атастаһыахтара. Эппиэттээхтэр: СӨ НА Төрөөбүт тылы үөрэтэр, чинчийэр, сайыннарар киинэ, РНА СС Гуманитарнай чинчийии уонна хотугу аҕыйах ахсааннаах омуктар проблемаларын үнүстүтэ итиэннэ М.К.Аммосов аатынан Хотугулуу-Илиҥҥи бэдэрээлинэй үнүбэрситиэт.
Бу туһунан Үөрэх уонна билим министиэристибэтэ иһитиннэрэр.
-
1
-
0
-
0
-
0
-
1
-
0
