Миниистир солбуйааччыта Семён Коркин тэрилтэ уонна тырааныспар систиэмэтин сайдыытыгар сүҥкэн кылааттарын киллэрбит бэтэрээннэргэ болҕомтотун туһаайда. Төһө да уустук килиимэттээх сиргэ олордоллор, тэрилтэ үлэһиттэрэ тустаах соруктарын дьоһуннук толороллорун бэлиэтээтэ.
– Куорат инфраструктуратын сайыннарарга, уопсастыбаннай тырааныспар суоппардарын имиджин көтөҕөргө уонна тэрилтэ материальнай-тэхиниичэскэй базатын тупсарарга анаммыт соруктары тэҥҥэ быһаарабыт, – диэтэ.
Саҥа технология, цифровизация киирдэҕинэ, өҥөнү оҥоруу хаачыстыбата тупса турарыгар эрэнэрин биллэрдэ.
Баһылык бастакы солбуйааччыта Владимир Дорожкин эҕэрдэ тылыгар тэрилтэ Дьокуускай устуоруйатын кытта быһаччы сибээстээҕин бэлиэтээтэ. Тэрилтэ атаҕар туруута судургута суох эрээри, устуоруйата күн бүгүнүгэр диэри салҕанарын, Дьокуускай түөлбэлэригэр, кытыы нэһилиэнньэлээх пууннарыгар дьону тохтоло суох таһа туралларын эттэ.
– ЯПАК бары исписэлиистэрин күргүөмнээх үлэтин түмүгэр өрөспүүбүлүкэ киин куоратын олохтоохторо, ыалдьыттара күннэтэ үөрэ-көтө айанныыллар, – диэн Владимир Дорожкин хампаанньа үлэтэ улахан суолталааҕын бэлиэтээтэ.
ЯПАК тэрилтэ дириэктэрин эбээһинэһин толорооччу Спартак Шульгин хампаанньа төрүттэммит кэмэ 1955 сыл ахсынньы 1 күнүнэн ааҕылларын эттэ. Бу кэмтэн ыла оптуобус паарката “Якутское пассажирское автохозяйство” диэн ааттаах (ЯПАХ) Дьокуускайдааҕы тырааныспар хонтуоратыттан арахсыбыт. Урут, сэбиэскэй кэмҥэ, ЯПАХ-ха оптуобустары таһынан М-20 мааркалаах массыыналар уонна ГАЗ-51 таһаҕас тиэйэр таксилар бааллара. Тэрилтэ Ленскэйгэ, Алдаҥҥа филиаллардааҕа. Ол саҕана Дьокуускай уулуссаларынан ЗИС-155 мааркалаах оптуобустар сүүрэллэрэ. Кэлин ПАЗ-651 уонна ЗИЛ-158 оптуобустар солбуйбуттара.
Тэрилтэ кэми кытта тэҥҥэ хардыылаан, уларыйан, улаатан иһэр. Бу сыллар усталарыгар ЯПАК тырааныспарын пааркатын улаатыннарыынан эрэ муҥурдаммакка, үлэ саҥа технологияларын, ньымаларын киллэрдэ, дьону таһарга Дьокуускай биир сүрүн тэрилтэтэ буолла. Куорат уопсастыбаннай олоҕор эмиэ көхтөөхтүк кыттар.
ЯПАК 70 сыллаах үбүлүөйүгэр тэрилтэ үлэтин түмүгүн таһаарар, ситиһиилэрин бэлиэтиир, кэлэр өттүгэр былааннары торумнуур оруннаах. Бу бэлиэ күн бастыҥ үлэһиттэргэ СӨ Тырааныспарга, суол хаһаайыстыбатыгар министиэристибэтин, Дьокуускай дьаһалтатын уонна куорат Дууматын бочуоттаах бэлиэлэрин, Хайҕал уонна Махтал суруктарын туттардылар.
Дьокуускай дьаһалтатын пресс-сулууспатын хаартыската.
-
0
-
0
-
0
-
0
-
0
-
0
