Бастатан туран, кэмитиэттэр бэрэссэдээтэллэрэ бэйэлэрин хайысхаларынан кылгас иһитиннэриилэри оҥордулар. Дьэ, ол кэннэ боппуруостары биэриигэ сүрүннээн нэһилиэктэр баһылыктара кытыннылар. Кинилэри биллэн турар, оскуолаларга буолаары турар улахан сарбыйыы долгутарын эттилэр. Түүлээх нэһилиэгин баһылыга Станислав Винокуров оскуола сорох үлэһиттэрэ хайыы үйэ сарбыйыыга баралларын туһунан биллэрии тутан олороллорун иһитиннэрдэ. Бу ыраах, чиэски, суола-ииһэ суох сиргэ олорор, аҕыйах нэһилиэнньэлээх нэһилиэккэ улахан охсуу буоларын эттэ. Онон 500-кэ диэри нэһилиэнньэлээх кыра нэһилиэктэргэ анал бырагыраама оҥоһуллара буоллар диэтэ. Тиэхиньикэ уматыга ыарыы турарынан гааска көһөн, оннук заправкалар баар буоллаллара уонна Уус Алдаҥҥа гаас ситимэ кэлэн ОДьКХ даҕаны кэмчилээһин тахсыан сөбүгэр санаатын үллэһиннэ. Чэриктэй нэһилиэгин баһылыга Альберт Карманов кинилэри эмиэ итинник боппуруостар долгуталларын эттэ. Ол курдук оскуолаҕа аҕыс, оҕо саадыгар үс ыстаат сарбыйыыга барарын туһунан этиллибит. Аны саҥа эбийиэктэри тутууга үбүлээһин көрүллүбэтэҕэ кыра нэһилиэктэр инники сайдыыларыгар харгыстары үөскэтэрин эттэ. Бу нэһилиэккэ билигин кулууп да, спортсаала да суоҕун, салгыы олох-дьаһах хайдах сайдыаҕын, уустук кэм уһаан иһиитэ кыра нэһилиэккэ ыарахаттары аҕалан иһиэҕин эттэ. Улуус кылаабынай бырааһа Сергей Черкашин эминэн хааччыллыыга үбүлээһин кыратын, көрүллүбүт харчы эрдэ бүтэрин, саҥа үлэлии кэлэр исписэлиистэргэ анаан дьиэ тутарыгар нэһилиэк да, улуус да дьаһалталарын өттүттэн сир бэриллэрин үрдүнэн ханнык бырагырааманан тутуллуон сөбө чуолкайа суоҕа уустуктары үөскэтэрин кэпсээтэ. Оттон үөрэх управлениетын начаалынньыга Федор Татаринов аҕыйах оҕолоох оскуолалар уопсай нормативка сөп түбэспэттэринэн, 10-11 кылаастара суох буолар кутталлаахтарын эттэ. Маныаха 20-30 оҕолоох оскуола орто оскуола буолара уустугун, оннук буолбатын туһугар нэһилиэнньэ эрдэттэн үлэлэһиэхтээх этэ диэн хоруй иһилиннэ. Мунньахха олохтоох салайыныы боппуруоһугар улахан кэпсэтии суох. Ол өйдөнөр. Бу сокуон барылын балачча илдьиритиһэн, кэпсэтэн биир санаа ылыллыбыта. Аны олоххо киириитигэр үлэлэһиэхтэрэ турдаҕа. Маны тэҥэ бөлөх Бороҕон арҕаа өттүн ититиинэн хааччыйыахтаах “Запад-2” хочуолунай тутуутун билистэ. Бу 1,5 млрд. солк. үбүлээһиннээх баараҕай тутуу федеральнай харчынан тутулла турар. Хочуолунай туһунан Александр Николаевич маннык эттэ: ”Манна улуус киинин илин уонна арҕаа өттүн хааччыйар улахан кыамталаах хочуолунайдары тутар туһунан кэпсэтии федеральнай таһымҥа өссө 2018 сыллаахха диэри барбыта. Онон бу хочуолунай үлэҕэ киирдэҕинэ, Бороҕону ититиинэн хааччыйыы балачча быһаарыллыаҕа. Улахан кэскиллээх тутуу үлэҕэ киирээри турар”.
Хаартыска : Улусмедиа
-
1
-
0
-
0
-
0
-
0
-
0
