Быйыл саха киинэтин хаассатын харчыта рекорду олохтоон, 280 мөл. солк. киллэрдэ. Ааспыт сылы кытта тэҥнээтэххэ, бу көрдөрүү икки төгүл улаатта. Саамай элбэх харчыны “Кончится лето”, “Диодорова”, “Айхал” уонна “Спид Стар” киинэлэр хомуйдулар. Онон Дьокуускайга тутуллар киинэ павильонун бырайыактыыр-симиэтэлиир докумуонун федеральнай үп көмөтүнэн кэлэр сылга оҥоруохтара.
«Speed Star» дьиҥ олоххо олоҕуран уһуллубут спортивнай байопик ис хоһоонун санаттахха, боруода аты соҕуруу дойдуттан Дьокуускайга аҕалаллар, кини ийэтэ-аҕата ат сүүрдүүтүн чөмпүйүөннэрэ эрээри, уһун көбүс-көнө атахтаах ат Туймаада туонатыгар бастакы сүүрдүүгэ аһары эрдэ инники түһэн, түргэнник сылайан, үһүс эрэ миэстэҕэ тиксэр. Кыайыыга эрэммит дьон: тэрилтэ дириэктэрэ, тириэнньэр аты сүүрдээччи уолу дэлби мөҕөллөр, Сергей Петрович сүбэтин истибэккэ, урут түһэн, сыыһа-халты туттан, кыайтардыбыт дииллэр. Буруйдаммыт уол түүн тахсан атын хаһыытыы-хаһыытыы кырбыыр, мөҕүллүбүтүн кининэн таһаарар.
Ону истэн Егор ойон туран, табаарыһын тохтотон, аты көмүскэһэн, уоскутар. Кыайтарбыт жокей сарсыныгар үлэтиттэн уурайан барар, кини оннугар киһи көрдүүллэр даҕаны, сабыллаары сылдьар мөлтөх туруктаах, хамнас аанньа төлөммөт тэрилтэтигэр ким да кэлиэн баҕарбат.
Онон аты көрөөччү, хойуутун хомуйааччы уол Егор бэйэтэ сүүрдэн көрөргө сананар. Боруода уһун атахтаах аты кытта бэрт түргэнник уопсай тылы булан, доҕордоһон, өссө түргэнник сүүрэр ис кыаҕын арыйар. Кини аты кытта бодоруһуоҕуттан «Speed Star» күүрээннээх күрэхтэһиигэ үс сыл тухары субуруччу иннин кимиэхэ даҕаны биэрбэккэ, биэтэккэ бастакынан кэлэр. Сүүрүүгэ чаҕылхай боруода ат рекордун күн бүгүҥҥэ диэри ким даҕаны куоһара илик.
Сайыҥҥы паралимпийскай оонньуу үрүҥ көмүс призера, аан дойду уонна Европа чөмпүйүөнэ Анастасия Диодорова олоҕун көрдөрөр "Диодорова. Сүүрүк утары" киинэтин дьон ытыы-ытыы көрбүттэрэ. Ити курдук саха киинэтин өрөспүүбүлүкэ тас өттүгэр эмиэ сэргээччи-сэҥээрээччи ахсаана сыл ахсын эбиллэ турар.
Ааптар хаартыскаҕа түһэриитэ.
-
0
-
1
-
0
-
0
-
0
-
0
