1928 сыллаахха Дьокуускайдааҕы педагогическай тиэхиньикуму, онтон 1931 сыллаахха иккис Москватааҕы судаарыстыбаннай үнүбэрсиэт тылга уонна литератураҕа салаатын үөрэнэн бүтэрэр.
Үгүс үлэтэ эдэр ыччаты, оҕону иитиигэ анаммыта. Оҕолорго аналлаах «Бэлэм буол» хаһыакка өр сылларга айымньылаахтык үлэлээбитэ.
Аан-бастаан «Ийэ» диэн хоһоонун 1927 сыллаахха «Чолбон» сурунаалга бэчээттэтэн, айар үлэҕэ үктэммитэ. Онтон ыла, айымньы бары жанрыгар элбэх хоһооннору, пьесалары, кэпсээннэри, уочаркалары, сэһэннэри суруйталаан хаалларбыта. «Быһах угун кыстыммат» диэн кэпсээннэрин хомуурунньуга саха литературатын көмүс фондатыгар киирбитэ. Онтон «Сааскы кэм» диэн романа биир саамай сүҥкэн айымньы быһыытынан биллибитэ, элбэх омук тылыгар тылбаастанан, үгүс норуоттар биһирэбиллэрин ылбыта. Ити курдук, Амма Аччыгыйа «Сааскы кэм» диэн кэрэхсэбиллээх айымньыны суруйан саха литературатын үрдүк таһымҥа таһаарбыта, саха прозатьҥар роман жанра сайдыытыгар олук уурбута, саҥа талааннар тахсалларыгар көҕүлээбитэ.
Хоһоонноро ырыа буолан ылламмыттара, 1926 сыллаахха суруйбут «Маҥнайгы учууталбар» диэн хоһоонун саха норуота күн бүгүнүгэр диэри уостан түһэрбэккэ ыллыыр.
Ону таһынан, уус-уран тылбаас устуоруйатыгар сүдү кылааты киллэрбит киһинэн биллэр, нуучча уонна атын омук улуу суруйааччыларын айымньыларын сахалыы тылбаастаабыта. Михаил Лермонтов, Лев Толстой, Михаил Шолохов, Николай Погодин, Фридрих Шиллер уонна да атын автордар айымньыларын сахалыы саҥардыбыта.
Николай Егорович ССРС уонна РСФСР Үрдүкү Сэбиэттэрин дьокутаатынан, элбэх сыллар устата суруйааччылар сийиэстэрин дэлэгээтинэн талылла сылдьыбыта. Кини иккитэ Үлэ Кыһыл Знамята, иккитэ Бочуот Знага уордьаннарынан, үгүс мэтээллэринэн наҕараадаламмыта. Кини аатын элбэх оскуола, уулусса, түмэл сүгэллэр.
1994 сыллаахха сэтинньи ый 14 күнүгэр күн сириттэн барбыта.
Хаартыскалар: Национальнай бибилэтиэкэ, Кэскил, Эдэр саас
-
1
-
0
-
0
-
0
-
0
-
0
