Устуоруйаны сэгэттэххэ, бырааһынньыгы суруналыыстар 1991 сылтан бэттэх ылаллар, оттон бу күн 1703 с. Арассыыйаҕа «Ведомости» бастакы хаһыат күн сирин көрбүтэ, маҥнай утаа тирааһа тыһыынча кэриҥэ эрэ буолбута. Хаһыат эрэдээктэрэ ыраахтааҕы Бүөтүр I илэ бэйэтинэн этэ. Кини ыйааҕынан, эрэстэрээннэргэ дьон мустан, илииттэн илиигэ уларса сылдьан хаһыаты ааҕаллара. Ыраахтааҕы хаһыакка дойду олоҕор туох уларыйыы тахсарын туһунан иһитиннэрэрэ. Онтон силистэнэн «Московские ведомости», «Российские ведомости» тахсыбыттара.
1914 с. хаһыат тирааһа 3000 экз. тиийбитэ. Сэбиэскэй Сойуус кэмигэр хаһыаты таһаарар эрэдээксийэлэри барыларын судаарыстыба бас билэрэ. Кинилэр хас биирдии этиилэрэ цензураны ааһара, тугу бэчээттииргин көҥүллээтэхтэринэ биирдэ таһаараллара.
Онтон Сэбиэскэй Сойуус ыһыллыбытын кэнниттэн, демократия көҥүл тыына илгийэн, чааһынай типографиялар, издательстволар, медиа-холдиннар аһыллыбыттара. Суруналыыстар идэлээх бырааһынньыктарын «Правда» хаһыат аһыллыбыт күнүгэр ыам ыйын 5-гэр бэлиэтииргэ этии киирбитэ эрээри, историческай даатаны талан, тохсунньу 13 күнүгэр, Арассыыйаҕа бастакы хаһыат тахсыбыт күнүгэр тохтообуттара. Онон сыл ахсын бу күн Бэчээт күнэ бэлиэтэнэр. Түгэнинэн туһанан, биир идэлээхтэрбитин Арассыыйа Бэчээтин күнүнэн итиитик-истиҥник эҕэрдэлиибит, суруйар бөрүөҕүт сыппаабатын, бэчээт бараммат байҕалыгар айымньылаах уһун олоҕу баҕарабыт!
Хаартыска СИА, Саргын Скрябин.
-
0
-
0
-
0
-
0
-
0
-
0
