Оҕо төрөөһүнүнэн биһиги өрөспүүбүлүкэбит Уһук Илиҥҥэ бастакы, Арассыыйаҕа онус миэстэни ылар. Оҕолор аҥаардара элбэх оҕолоох ыалга төрүүр, кинилэр ахсааннара 34,5 тыһ. тиийдэ. Онон Саха Сиригэр хас бэһис ыал элбэх оҕолоох.
Ол эрээри, дойду үрдүнэн төрөөһүн көрдөрүүтэ аччыы турара эмиэ дьайар. Ол иһин ыал буолар эдэр дьоҥҥо 50 000 солк. биэрэллэр, элбэх оҕолоох ыаллар хомунаалынай өҥөлөрүн төлүүллэригэр 30 % чэпчэтиинэн туһаналлар, сир учаастагынан хааччыллаллар, оҕолор оскуолаҕа босхо аһыыллар, оптуобуска босхо айанныыллар, кэллиэскэ төлөбүрдээх үөрэххэ киирдэхтэринэ харчынан биэрэллэр. Итинник араас көмө ахсаанын ааҕан сиппэккин. Аҥаардас былырыын элбэх оҕолоох ыаллары өйүүргэ өрөспүүбүлүкэ бүддьүөтүттэн 5 млрд. солк. тахса үбү ыыппыттара.
Олохторугар ыарахан балаһыанньаҕа түбэспит дьону дьадайыыттан таһаарарга Ил Дархан Айсен Николаев ыйаах таһаарбыта. Ол чэрчитинэн 25 000 киһиэхэ судаарыстыба көмөлөстө. Онон дьадайыы бырыһыана 12,8-тан 12,6 %-ҥа диэри түһүөхтээх.
Ас-таҥас сыаната ыарыы турар кэмигэр дьону үлэнэн, сөптөөх хамнаһынан хааччыйыы баар буолуохтаах. Билигин хаһааҥҥытааҕар даҕаны үлэтэ суох буолуу намтаан турар кэмэ, төттөрүтүн хас тэрилтэ аайы үлэһит тиийбэт.
Хаартыска Ксенофонтовтар архыыптарыттан.
-
0
-
0
-
0
-
0
-
0
-
0
