Гитлер Ленинград куораты ылан, Балтийскай флотка, Архангельскайга, Мурманскайга тахсар былааннааҕа. Өстөөх төгүрүйүүтүгэр дьиэлэр ититииттэн, ууттан, кирдээх ууну тоҕор ситимтэн арахсан турбуттара, куорат устун аччыктааһын, тоҥуу-хатыы турбута. 1941-1942 сс. кыһын олус тымныы, тыйыс этэ. Нева өрүс кытылыгар турар куоракка 107 158 буомба, 150 000 тахса ыарахан артиллерия снарядтара түһэн, историческай пааматынньыктарга улахан хоромньу оҥоһуллубута. Фашистар Павловскай, Пушкин, Петергоф аатырбыт дыбарыастарын, пааркаларын уматан, халаан, фонтаннары алдьатан барбыттара. Эрмитаж, Кыһыҥҥы дыбарыас эмиэ улахан буомбалааһын кэнниттэн сөргүтүллэн, чөлүгэр түһэрбиттэрэ.
Куораты сири кытта ситимниир биир соҕотох суол баара, Ладожскай күөлүнэн барар олох суолунан сайын устар аалларынан, кыһын муус устун аһы-үөлү, сэрии сэбин тиэйэллэрэ даҕаны, фашистар сөмөлүөттэрэ көтөн кэлэн быыстала суох буомбалыы, артиллерия тоҕута ытыалыы тураллара. Блокада кэмигэр нуорма быһыытынан, күҥҥэ 125 гыраам килиэп тоорохойун быһа тутан биэрэллэрэ. Ол иһин олохтоохтор тоҥон-хатан, хам аччыктаан, ытыалааһыҥҥа түбэһэн, аҕыйах киһи тыыннаах ордубута. Кэлин Санкт Петербург куораттааҕы сууда Ленинград блокадатын нацисткай геноцид диэн билиммитэ.
Бу күн Дьокуускайга "Туймаада", "Сахаэкспоцентр", "Проспект" атыы-эргиэн кииннэригэр "Блокада килиэбэ" диэн аахсыйа ыытыллыаҕа. Аахсыйаны "Кыайыы волонтердара" уопсастыбаннай түмсүү ыытыаҕа, кинилэр килиэп тоорохойун уонна Ленинград өстөөх төгүрүйүүтүттэн босхоломмут күнүн туһунан листовкалары түҥэтиэхтэрэ. Оттон үөрэх кыһаларыгар бу күн суолтатын туһунан кэпсиир уруоктар буолуохтара.
Хаартыска СИА, Анна Лебединская.
-
0
-
0
-
0
-
0
-
0
-
0
