Сүрүн иһитиннэриини оҥорбут кэллиэгийэ бэрэссэдээтэлин э.т., ис дьыала миниистирин солбуйааччы, ис сулууспа полковнига Владимир Климов быраабы араҥаччылааһын үлэтигэр биллэр-көстөр ситиһиилэр баалларын бэлиэтээтэ, сыыппаранан чахчылары холобурдаан, салааларынан үлэ-хамнас түмүктэрин сырдатта. Ураты болҕомто Анал байыаннай дьайыы бэтэрээннэрин бырааптарын араҥаччылааһыҥҥа, АБДь кыттыылаахтарын уонна кинилэр дьиэ кэргэттэрин өйөөһүн таһымын үрдэтиигэ ууруллубутун тоһоҕолоон бэлиэтээтэ.
Норуот дьокутаата Афанасий Владимиров ИДьМ үлэһиттэрин саҥа 2026 сылынан эҕэрдэлээтэ, ааспыт сыллаах үлэ түмүктэрин таһаарыы үүммүт сылга туруоруллар соруктары чопчулуурун эттэ. Кэнники сылларга буруйу оҥоруу ахсаана аҕыйаан, быраабы араҥаччылыыр уорганнарга нэһилиэнньэ эрэлэ күүһүрэн иһэр. Ил Түмэн уонна Ис дьыала министиэристибэтэ Сөбүлэһии түһэрсэн үлэлииллэрэ олус көдьүүстээх, тустаах Уураахтары уонна сокуон көҕүлээһиннэрин бииргэ дьүүллэһии өрөспүүбүлүкэбит быраабын баазатын тупсарар диэтэ.
Итэҕэс быһыытынан саастарын ситэ оҕолор буруйу оҥорууларын уонна арыгылааһын көрдөрүүлэрэ намтатыллыбатын ыйда, норуот дьокутааттара итиэннэ олохтоох салайыныы уорганнара бу кыһалҕаҕа болҕомтобутун уурарбыт наада диэтэ. Норуоттар икки ардыларыгар сиэрдээх, доҕордуу сыһыан уопсастыба олоҕор-дьаһаҕар улахан суолталааҕын санатан, ИДьМ бары үлэһиттэрин Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылларын чэрчитинэн ыытыллар дьаһалларга көхтөөхтүк кыттарга ыҥырда.
Өрөспүүбүлүкэ социальнай-экэнэмиичэскэй сайдыытыгар киллэрбит кылаатын иһин, Ил Түмэн Бэрэссэдээтэлин өйдөбүнньүк бэлиэлээх Махтал суругун Госавтоиниспиэксийэ управлениетын начаалынньыгар, полиция полковнига Александр Архиповка туттарда. Бу туһунан Ил Түмэн пресс-киинэ суруйар.
Хаартыска: Василий Кононов.
-
1
-
0
-
0
-
0
-
0
-
0
