Кылгастык санатан эттэххэ, тустаах сокуону ахсынньы 5 күнүгэр 2013 с. ылыммыттара. Бу сокуон чэрчитинэн өрөспүүбүлүкэҕэ кыраадыстаах утаҕы анал атыы-эргиэн эбийиэктэригэр эрэ атыылыахха сөп, ону таһынан, киэһэ 20 ч. күнүс 14 ч. диэри итирдэр утаҕы атыылааһын уопсастыбаннай аһылык эбийиэктэриттэн ураты бобуллар.
Урбааҥҥа уонна туризмҥа сис кэмитиэт бэрэссэдээтэлэ Алексей Корнилов күн бүгүн биһиги өрөспүүбүлүкэбит итирдэр утаҕы стационарнай атыы-эргиэн эбийиэктэригэр эрэ атыылыыр Арассыыйа эрэгийиэннэриттэн соҕотох субъект буоларын туһунан иһитиннэрдэ. Бу сокуон дьон доруобуйатын, уопсастыбаннай бэрээдэги харыстыырга, итирэн баран буруйу оҥорууну аҕыйатар туһугар оҥоһуллубутун бэлиэтээтэ.
Ил Түмэн хонтуруоллуур кэмитиэтин бэрэссэдээтэлэ Андрей Николаев бүгүҥҥү мунньах көннөрү кураанах сыыппара тула кэпсэтии буолбакка, испиирдээх утаҕы иһиини кыччатарга көдьүүстээх этиилэри истиэхпит диэн эрэлин биллэрдэ.
СӨ Урбааҥҥа, атыыга-эргиэҥҥэ уонна туризмҥа миниистирин бастакы солбуйааччыта Максим Карбушев итирдэр утах атыытын хонтуруоллуур үлэ 2025 с. түмүктэрин билиһиннэрдэ.
Билиҥҥи туругунан, Саха Сиригэр кыраадыстаах утаҕы 403 юридическэй сирэй атыылыыр, 925 атыы-эргиэн эбийиэгэ баарыттан 716-та итирдэр утаҕы атыыга таһаарар. Уопсастыбаннай аһылык ситимин нөҥүө 209 эбийиэк арыгынан эргинэр.
Ааспыт сылы кытта тэҥнээтэххэ, кыраадыстаах утаҕы атыылааччылар 2,4 % аҕыйаабыттар. Арыгыны атыылыырга лиссиэнсийэ ыларга судаарыстыбаннай пошлина быһыытынан бүддьүөккэ 2021 с. 28368,00 тыһ. солк., 2025 с. 22750, 00 тыһ.солк. төлөммүт. Сылга ортотунан 20 мөл. тахса солк. кэриҥэ киирэр. Былырыын госпошлина кээмэйэ кыччаабытын үгүс урбаанньыттар лиссиэнсийэлэрин 5 сылга уһаппыттарынан быһаарыахха сөп.
Урбаан министиэристибэтэ 2023-2025 сс. 278 хонтуруоллуур тэрээһини ыыппыт. Ол түмүгэр суут уорганнара 11 түгэнинэн административнай эппиэтинэскэ тардыбыттар. Уопсайа 390 тыһ. солк. суумалаах ыстараабы төлүүргэ 10 уураах толоруллубут, биир сэрэтии оҥорбуттар.
Оттон пиибэ атыытын кээмэйинэн Саха Сирэ Уһук Илин 11 эрэгийиэниттэн 6 миэстэни ылар. 2025 с. үһүс кыбаарталын түмүгүнэн өрөспүүбүлүкэҕэ 1720,61 тыһ. декалитр пиибэни уонна пиибэ утаҕын атыылаабыттар. 2024 с. кытты тэҥнээтэххэ, бу көрдөрүү 53,6% кыра. Көөнньөрүүлээх араҕас утаҕы иһии Уһук Илин атын эрэгийиэннэригэр эмиэ аҕыйаабыт. Итиниэхэ экэниэмикэ усулуобуйата, дьон атын утаҕы талара эмиэ сабыдыаллыыр.
Василий Кононов, ааптар хаартыскаҕа түһэриитэ.
-
1
-
0
-
0
-
0
-
0
-
0
