Андрей Находкин Мэҥэ Хаҥалас улууһугар Майа нэһилиэгэр 2 эбийиэк кыраадыстаах утаҕы атыылыыр, бэс ыйын 26 күнүгэр Майаҕа арыгы атыытын бобор туһунан сокуону ылыммыттар, ол олоххо 2026 с. кулун тутар 1 күнүттэн киирэр диэн иһитиннэрдэ. Урбаанньыттар арыгы бородууксуйатын атыылыыр лиссиэнсийэлэрэ 2028-2029 сс. бүтэр эбит. Оччотугар ити лиссиэнсийэлэрин былдьыыллар дуо диэн ыйыталаста дьокутаат.
СӨ Урбааҥҥа, атыыга-эргиэҥҥэ уонна туризмҥа миниистирин бастакы солбуйааччыта Максим Карбушев сокуон кулун тутар 1 күнүттэн олоххо киирэринэн, кыраадыстаах утах атыыта тохтуурун туһунан эттэ.
Ньургуйаана Заморщикова Урбаан министиэристибэтэ этэринэн, итирдэр утаҕы атыылыыр легальнай биисинэс кыччыы турар, оттон ИДьМ дааннайынан итирэн баран буруйу оҥоруу улахан саастаах оскуола оҕолоругар элбээбит. Икки министиэристибэ сыыппарата тоҕо тус-туһунан көрдөрүүнү этэрин туоһуласта.
Ону Максим Карбушев тустаах министиэристибэ хонтуруоллуур үлэни ыытар, лиссиэнсийэни биэрэр, итиэннэ дьон сайабылыанньатынан, Прокуратура ирдэбилинэн арыгыны атыылыыр эбийиэктэри бэрэбиэркэлиир диэн хоруйдаата. Ону таһынан, сэрэтэр үлэни ыытар. Биэдэмистибэлэр икки ардыларыгар Дьокуускай куорат дьаһалтатын, легальнайа суох арыгы атыытын тохтотор ыстаабы кытта бииргэ үлэлэһэллэрин бэлиэтээтэ.
Кини кыраадыстаах утаҕы атыылыыр маҕаһыыннарга 1-2 эрэ кэһии баарын, онтон атына уопсастыбаннай аһылык туочукаларын, сымыйа кафелар нөҥүө буруй-сэмэ тахсарын иһитиннэрдэ. Лиссиэнсийэтэ суох атыыһыттары уодьуганныырга Урбаан министиэристибэтин боломуочуйата элбэҕэ суоҕун тириэртэ.
Оччотугар легальнай урбааны хам баттыыбыт, оттон көҥүлэ суох урбаан тэнийэн иһэр диэтэ Ньургуйаана Заморщикова. Төһөнөн бобоҕун, дьон оччонон сир аннынан кистээн кыраадыстаах утаҕы син биир атыылыыр.
Василий Кононов хаартыскаҕа түһэриитэ.
-
10
-
3
-
2
-
3
-
3
-
4
