«Саха» НКИК күн бүгүн 4 телеканааллаах, 2 саайтаах, ону таһынан, сахалыы сериаллары устан көрдөрөр, олоҥхоҕо баттл тэрийэр, Олоҥхо, Туймаада ыһыаҕын тиһигин быспакка сырдатар, быйыл сибээс үчүгэй түгэнигэр быһа эпиири оҥорорго бэлэмнэрин биллэрдилэр.
СӨ АГИП Информационнай бэлиитикэҕэ уонна маассабай коммуникацияҕа департаменын салайааччыта Семен Трофимов бириэмэ биир сиргэ турбатын, дьон социальнай ситимҥэ көһөрүн этэн туран, «Саха» НКИК айымньылаах үлэтин биһириирин бэлиэтээтэ. Донбааска командировкаҕа сылдьан «Якутия24», «Мамонт» өрүү көрөрүн, куйаар ситимэ баар сиригэр ханна баҕарар киирэн көрүөххэ сөбүн туһунан кэпсээтэ.
«Сахабэчээт» генеральнай дириэктэрин сүбэһитэ Валентина Бочонина национальнай бэчээт уонна суруналыыстыка кырдьыкка олоҕуран сонуннары тарҕатыахтааҕын, нэһилиэнньэ гражданскай позициятын, култуурунай сыаннастарбытын бөҕөргөтүөхтээҕин бэлиэтээтэ. «Сахабэчээт» тэрилтэ «Өлбөт үйэлээх пуолка» эрэгийиэннээҕи салаата буоларын быһыытынан, патриотическай иитиигэ улахан болҕомтотун уурарын, быйыл буойуннар хаартыскаларын туппутунан параат эмиэ буоларын туһунан эттэ. «Якутия» хаһыат эрэдээксийэтэ чэпчэки атлетикаҕа Кыайыы эстафетатын ыытыахтаах.
Кини «Саха Сирэ» хаһыат саайтын таһаарааччы эрэдээктэрэ Сардаана Баснаева көҕүлээһининэн «Сэдэх экспонаттар» диэн бырайыак иитинэн өрөспүүбүлүкэ сүүрбэччэ түмэлин кытта бииргэ үлэлэһэн, сырдатар үлэни ыытарын туһунан эттэ.
Валентина Бочонина эрэдээксийэ иһигэр култуураны биир эрэ киһи сыһыарыллан сырдатарынан сибээстээн, Култуура сылын тэрээһиннэрин, испэктээктэр премьераларын сырдатыыга бу эйгэҕэ үлэлии сылдьар дьону, искусствоведтары кыттыһыннаран, матырыйаал суруйтарар көдьүүстээх буолуон сөбүн туһунан санаатын үллэһиннэ. 1990-ус сылларга бэчээт эйгэтигэр итинник быраактыка баарын, ону сөргүтэр оруннааҕын аҕынна.
Ити курдук, сонуннары киэҥ эйгэҕэ тарҕатар ситим үлэһиттэрэ бары төгүрүк остуолга мустан, Култуура сылын сырдатарга ким хайдах үлэлии сылдьарын, туох санаалааҕын эттилэр.
СӨ Инновацияҕа, сыыппара сайдыытыгар уонна инфокоммуникационнай технологияҕа министиэристибэ маассабай информация сириэстибэлэригэр уонна бэчээккэ судаарыстыбаннай бэлиитикэ салаатын салайааччыта Афанасий Матвеев Култуура сылыгар биир кэлим медиа-ыстаап тэриллэрэ наадатын бэлиэтээтэ. Кини тэрээһиннэри сырдатыынан эрэ муҥурдаммакка, «Саха» НКИК курдук дьоҥҥо интэриэһинэйи, аныгыны, сонун сүүрээни бэйэҕит айан таһаарыахтааххыт диэтэ.
Түмүккэ СӨ Култууратын уонна духуобунай сайдыытын министиэристибэтин Махтал суругун «Саха Сирэ» хаһыат кэрэспэдьиэнигэр Надежда Егороваҕа, анаарааччытыгар Ангелина Васильеваҕа туттардылар. Национальнай бэбилитиэкэ Махтал суругун «Якутия» хаһыат сүрүн эрэдээктэрин солбуйааччытыгар Евгений Грибчатовка, кэрэспэдьиэнигэр Күннэй Еремееваҕа, ЯСИА кэрэспэдьиэнигэр Саина Титоваҕа биэрдилэр.
Түгэнинэн туһанан, биир идэлээхтэрбитин эҕэрдэлиибит, Култуура сылыгар култуураҕа чугас дьоҥҥо өссө айымньылаах, таһаарыылаах үлэни баҕарабыт.
СӨ Култууратын уонна духуобунай сайдыытын министиэристибэтин пресс-сулууспата хаартыскаҕа түһэриитэ.
-
0
-
0
-
0
-
0
-
0
-
0
