Күрэхтэһии сүрүн тэрийээччитэ, тустуу тириэньэрэ Прокопий Огудов ол туһунан маннык кэпсиир:
– Мин бу успуорт саалата саҥа тутуллан үлэҕэ киирбитигэр, көҥүл тустуу тириэньэринэн ананан үлэлии кэлбитим. Нэһилиэкпит былыргы бухатыырдарын, Моруот уонна Аҥкыр, ааттарын ааттатар күрэхтэһии аан бастаан 1989 сыллаахха тэриллибитэ. Дьиҥинэн, сүүрбэттэн тахса сыл ыытыллыбыт буолуохтаах этэ да, успуорт саалабыт үлэлээбэккэ турбут буолан, тохтуу сылдьыбыта. Кэлин оҥоһуллубутун кэнниттэн сөргүтэн, быйыл онус төгүлүн ыытабыт. Сырыы ахсын ыаллыы улуустартан сүүстэн тахса оҕо кэлэн кыттарыттан киһи үөрэр. Араас сыллардаах күрэхтэһиилэргэ көхтөөхтүк кыттыбыт бэйэм үөрэнээччилэрим Сергей Петров, Максим Николаев, Петр Татаринов, Дмитрий Иванов, Иннокентий Харлампьев, Алексей Таскин, Иван, Гаврил Алексеевтар тэрээһиҥҥэ күүс-көмө буолаллар, бириистэри хааччыйарга успуонсардыыллар. Ону таһынан, биллэн турар нэһилиэкпит дьаһалтата итиэннэ Моруот уонна Аҥкыр аҕа уустарын аймахтара, Никифоровтар, көмөлөһөллөр.
Күрэхтэһиигэ Бүлүү, Υѳһээ Бүлүү, Горнай уонна Кэбээйи улуустарыттан барыта 104 эдэр бөҕөс күрэхтэстэ. Судьуйаларынан Егор Степанов (Илбэҥэ), Эрхаан Соркомов (Горнай, Бэрдьигэстээх), Сергей Александров (Бүлүү), Ян Филиппов (Горнай, Мытаах), Андрей Сивцев (Бүлүү), Михаил Павлов (Горнай, Кэптин) үлэлээтилэр. Кылаабынай сэкирэтээр эппиэтинэстээх үлэтин Эдуард Никифоров (Бүлүү) толордо.
Бэрт үгүс ыалдьааччылаах, сытыы киирсиилэрдэх, кылбар быраҕыылардаах, ыһыылаах-хаһыылаах киирсиилэр түмүктэринэн кыайыылаахтар ааттаннылар, харчынан бириистэри туттулар.
Ол курдук, 2018 сыллаах төрүөх уолаттарга: 22 киилэ ыйааһыҥҥа Юрий Александров (Бүлүү), 25 киилэ ыйааһыҥҥа Аким Колесов (Горнай, Маҕарас) бастаатылар.
2016 -- 2017 сыллаах төрүөх уолаттарга: 30 киилэ ыйааһыҥҥа Дархан Кононов (Бүлүү), 35 киилэ ыйааһыҥҥа Яков Харитонов (Кэбээйи, Баҕадьа), 40 киилэ ыйааһыҥҥа Эрхан Николаев (Бүлүү) бастаатылар.
2014 – 2015 сыллаах төрүөх уолаттарга: 28 киилэ ыйааһыҥҥа Саша Борисов (Илбэҥэ), 35 киилэ ыйааһыҥҥа Эрэл Аммосов Эрэл (Бүлүү), 45 киилэ ыйааһыҥҥа Айсен Чуруков (Бүлүү) бастаатылар.
2012 – 2013 сыллаах төрүөх уолаттарга: 50 киилэ ыйааһыҥҥа Коля Никифоров (Бүлүү) бастаата.
Муҥутуур кыайыылаахтары быһаарар киирсиигэ кыраларга 24, улахаттарга 9 бөҕөс холосто. Кыра уолаттарга Бүлүү куоратыттан Дархан Кононов (III кылаас үөрэнээччитэ) муҥутуур кыайыылаах аатын ылан, харчынан 15 000 солкуобай бирииһи тутта. "Бу бастакы ситиһиим, кыайбыт харчыбынан төлөпүөн ылыныам", -- диэн кини баҕа санаатын эттэ.
Улахан уолаттарга муҥутуур кыайыылаах аатын Илбэҥэ бөҕөһө Альберт Платонов (IX кылаас үөрэнээччитэ) ылла, Моруот уонна Аҥкыр сыдьааннара туруорбут бириистэринэн, харчынан 35 000 солкуобайынан, уонна куубагынан наҕараадаланна.
– Күүстээх эрчиллии түмүгэр кыайдым. Дойдум эркинэ да көмөлөстөҕө дии. Элбэх өрөспүүбүлүкэтээҕи күрэхтэһиилэргэ кыттыбытым, миэстэлэспитим. – диэтэ Альберт.
Кыайыыга дьулуурдарын иhин 29 уол биhирэбил бириистэринэн бэлиэтэннилэр. Илбэҥэ сүүмэрдэммит хамаандатын чилиэннэрэ Сандаар Алексеев, Илья Николаев, Артем Николаев, Альберт Платонов, Эрхаан Кириллин аймахтара туруорбут анал бириистэрин тутан үөрүүлэрэ үксээтэ. Чаҕылхай киирсиини кѳрдѳрбүт Олег Васильевка учууталлара И.Н. Жиркова, М.И. Афанасьева бэйэлэрин бириистэрин туттардылар.
Баппаҕаайы нэһилиэгэр икки сүүс сыл анараа өттүгэр олорон ааспыт, номохо киирбит күүстээх дьоннор, ини-бии Аҥкыр уонна Моруот ааттарын үйэтитэр соруктаах, саха дьоно-сэргэтэ бэркэ кэрэхсиир күрэхтэһиитэ сааскы сайаҕас күн нэhилиэк олохтоохторун сэргэхситтэ. Кыттыбыт эдэр бөҕөстөр уонна кинилэргэ «ыалдьыбыт» оҕолор өйдөрүгэр-санааларыгар умнуллубаттык хаалыаҕа.
«Көмүс бөрүѳ» медиа-киин. Илбэҥэ, Бүлүү.
Хаартыска: Людмила Тарасова.
-
0
-
0
-
0
-
0
-
0
-
0
