Амма өрүскэ Амма Солобуодатын аннынан муус хамсааһына бэлиэтэнэр. Бу туһунан УГМС Саха сиринээҕи салаата 2026 сыл ыам ыйын 5 күнүгэр уу эбийиэктэрин туруктарын туһунан сибиэдэнньэтигэр иһитиннэрдэ .
Өлүөнэҕэ муус алын кирбиитэ Иркутскай уобалас Подымахино сэлиэнньэтин аннынан билиннэ. Иркутскай уобалас Марково сэлиэнньэтигэр муус хамсаата. Иркутскай уобалас Марковоттан Визирнэйгэ диэри учаастагар уу таһыма үрдүүр. Өлүөнэ орто сүнньүгэр, Алдаҥҥа, Бүлүүгэ уу таһыма үрдүүр. Дьокуускайга диэри учаастакка суукка иһигэр уу 13–43 см үрдээтэ.
Амма өрүс үөһээ сүүрүгэр (Быйаагы гидропост, Алдан оройуона) уу таһыма сууккаҕа 44 см үрдээтэ. Орто сүүрүгэр Амма сэлиэнньэтин таһыгар уу таһыма — 251 см, муус хамсааһына бэлиэтэнэр, кутталлаах таһым — 925 см. Алын сүүрүгэр Харбалаах сэлиэнньэтин таһыгар (Таатта улууһа) уу өрүс кытыытыгар 46 см үрдээтэ, муус хараарда. Амма улууһугар Саха Сиринээҕи Ыксаллаах быһыы-майгы министиэристибэтин биэдимистибэлэр икки ардыларынааҕы суһал бөлөхтөрө сааскы халаан куттала суох ааһарын хонтуруоллуур сыаллаах тиийдилэр.
Ыам ыйын 4 күнүгэр Өлүөхүмэ өрүс орто сүүрүгэр, Забайкальскай кыраай Орто Өлүөхүмэ сэлиэнньэтин таһыгар муус эһиннэ. Дьэкиимдэ — Куду-Күөл гидропост (Өлүөхүмэ оройуона) учаастагар уу таһыма 2–18 см үрдээтэ, муус хараарда. Манна ыам ыйын 7–9 күннэригэр муус хамсааһына күүтүллэр.
Тээнэ сэлиэнньэтин (Өлүөхүмэ оройуона) таһыгар уу таһыма 192 см, суукка иһигэр 1,4 м түстэ. Муус харгыһа бэлиэтэнэр — кутталлаах таһым 550 см.
Алдан, Уус Маайа, Томпо оройуоннарыгар уу таһыма 42 см үрдээбит. Уу муус үрүгэр таҕыста, сорох сирдэргэ муус хараарда.
Уус Юдоматтан Чабдаҕа диэри (Уус Маайа оройуона) учаастакка уу таһыма сууккаҕа 12-40 см үрдүүр.
Бүлүү өрүс Кириэстээх-Бүлүү учаастагар уу таһыма күҥҥэ 29-47 см үрдүүр,
Марха өрүс: Чумпуруктан Маалыкай нэһилиэгэр диэри (Ньурба оройуона) уу таһыма сууккаҕа 28-52 см үрдүүр. Хоту уонна хотугулуу-илин өрүстэргэ кыһыҥҥылыы эрэсиим бэлиэтэнэр.
Хаартыска: эрэдээксийэ
-
0
-
0
-
0
-
0
-
0
-
0
