Өлүөнэ өрүс аллараа сүрүүгэр, ордук Хаҥалас улууһугар үрдүүрэ бэлиэтэннэ. 12 чаас устата Покровскай аннынан 20 см үрдээн 829 см тиийдэ. Иһит сэлиэнньэтигэр 12 чаас устатыгар 3 см түстэ.
Сунтаар улууһугар Бүлүү өрүскэ түһэр салаа үрэхтэргэ сайыҥҥы халаан уута тахсан билигин төһө хоромньуну таһаарбытын ааҕыы барар. 150 олбуор уонна 46 олорор дьиэ ууга барбыта билиннэ. Халаан уутун содулугар Кэмпэндээйи, Туойдаах уонна Тэҥкэ сэлиэнньэлэрин икки ардыларыгар тырааныспар сырыыта тохтоото.
Дьааҥы өрүскэ Дьааҥы улууһун сиригэр-уотугар уу таһыма түһэр. Баатаҕайга суукка иһигэр 47 см түстэ. Ол гынан баран, өрүс салааларыгар: Дулҕалаах өрүскэ Суордаах уонна Томтор сэлиэнньэлэригэр уу таһыма 23 уонна 24 см үрдээтэ. Оттон Адыаччы өрүскэ Бөтөҥкөс сэлиэнньэтин аннынан 86 см үрдээтэ. Бу салааларга уу кутталлаах таһымҥа чугаһаата.
Бытантай өрүскэ Эбээн Бытантай улууһун киинэ Баатаҕай Алыытын аннынан уу таһыма 24 см түстэ, сайыҥҥы халаан кэмигэр манна 24 олбуор ууга барбыта, ол иһигэр АЗС уонна аэропорт. Кустуур сэлиэнньэтигэр 6 чаас иһигэр уу 29 см түстэ, кутталаах таһымҥа диэри 70-80 см см хаалла. Кылгас кэмҥэ дьону олордор пууҥҥа 27 киһи, ол иһигэр 12 оҕо бааллар. Дьарҕаалаах сэлиэнньэтигэр уу таһыма 26 см түстэ.
Уу таһымын намтааһына Өлүөнэ өрүскэ Ленскэй улууһугар бэлиэтэнэр. Атын өрүстэргэ Нерюнгри, Өймөкөөн, Муома улуустарыгар уу түһэр. Индигиир өрүс баһыгар уу таһыма үрдүүр, ол гынан баран кутталлаах таһымыгар диэри 63 см саппаастаах.
Хаартыска “Бытантай уоттара” хаһыат саайтыттан.
-
0
-
0
-
0
-
0
-
0
-
0
