Андрей Борисовы өрөспүүбүлүкэҕэ билбэт киһи суоҕа буолуо. Кини өр сылларга Саха Сирин култуураҕа уонна духуобунай сайдыыга министиэристибэтин салайбыта, Аартыкатааҕы судаарыстыбаннай култуура уонна ускуустуба үнүстүүтүн тэрийбитэ, Олоҥхо тыйаатырын арыйбыта. Кини аатын кытта ЮНЕСКО Олоҥхону аан дойду матарыйаалынайа суох шедеврынан билиниитин уонна саха киинэтин сайдыытын кытта ситимниибит. Андрей Саввич билигин бэйэтин толкуйдарын, былааннарын Аартыкатааҕа эпос уонна ускуустуба киинигэр салгыы киллэрэр.
“Андрей Саввиһы кытта өр сылларга үлэлээн, кини көҥүл санаатын уонна тугунан кээмэйдэммэт киэҥ, далай толкуйдарын, хорсун санаалах айымньылаах үлэтин уонна ураты уустук идиэйэлэри сатаан олоххо киллэрэр уратытын сыаналыыбын. Саха Сиригэр Култуура сылыгар киниэхэ бу үрдүк аат иҥэриллибитэ туһугар эмиэ үчүгэй бит-бэлиэ. Ону тэҥэ, бу наҕараада өрөспүүбүлүкэ култууратын харыстааһыҥҥа уонна сайыннарыыга үлэлэһэр дьон сыраларын, кылааттарын сыаналааһынынан буолар. Андрей Саввиһы бу наҕарааданан эҕэрдэлиибин, кытаанах доруобуйаны уонна саҥа толкуйдары баҕарабын. Кини Арассыыйа уонна Саха Сирин култууратыгар суолталаах чаҕылхай ситиһиилэри өссө да аҕалыаҕа диэн эрэнэбин”, -диэн Ил Дархан дириҥ эҕэрдэтин, баҕа санаатын биллэрбит.
«Ил Түмэн» издательскэй дьиэ” аптаныамынай тэрилтэ аатыттан Андрей Саввиһы бу үрдүкү судаарыстыбаннай наҕарааданан- Үлэ Дьоруойа аат иҥэриллибитинэн итиитик-истиҥник эҕэрдэлиибит, кытаанах доруобуйаны, ситиһиилэри баҕарабыт!
-
0
-
0
-
0
-
0
-
0
-
0
