«РФ Судаарыстыбаннай Дууматын дьокутаата Галина Иннокентьевна Данчиковалыын, Өлүөхүмэ улууһун баһылыга Николай Николаевич Харбинныын, СӨ Тыатын хаһаайыстыбатын министиэристибэтин уонна нэһилиэктэр баһылыктарын кытта тустаах боппуруоска мунньах ыыттыбыт. Ааспыт нэдиэлэҕэ тыа хаһаайыстыбатын министиэристибэтин салалтата уонна билим үлэһиттэрэ улууска сылдьан, хоромньуну туоһулуур аакталары оҥорон, балаһыанньаны үчүгэйдик билэллэр. Ону таһынан, олохтоохтортон элбэх этиини, санааларын иһиттим. Командировкам кэмигэр кинилэри кытта көрсөн баар кыһалҕалары ырытыстым.
Бүгүҥҥү күҥҥэ барыллаан ааҕынан, 11 тыһ. гектаар оттонор ходуһаттан 8 тыһ. ууга былдьаммыт. Бу улахан иэннээх сир, билигин сүрүн сорукпутунан тыа хаһаайыстыбатын үлэһиттэригэр хоромньуну кыччатан, сүөһүнү-сылгыны кыстатары хааччыйыы буолар. Улуус биир бөдөҥ хаһаайыстыбатыгар -- «Кладовая Олекмы» тэрилтэҕэ быйылгы халаан уута былырыыҥҥы саппаастара баар буолан, улахан кутталы үөскэппэт, ол эрээри, кинилэргэ эмиэ өйөбүл наада. Болҕомтону ордук кэтэх ыалларга уонна оту бэлэмнээччилэргэ уурабыт. Кинилэр ходуһалара ууга баран, наадалаах кээмэйи кэмигэр бэлэмниир кыахтара суох уонна уу кэлэн ааспытын кэннэ от хаачыстыбата лаппа мөлтүүр.
Хоромньуну кыччатар миэрэлэринэн эбии биригээдэлэри уонна атын сиргэ оттооһуну тэрийии, ону тэҥэ, оту атыылаһар уонна тиэйэр ороскуоттары толуйуу буолаллар.
Галина Иннокентьевна Данчикова өйөбүлү кэмигэр оҥорор туһуттан болдьоҕу чопчу тутуһар наадатын бэлиэтээтэ. Салгыы үлэлиибит. Бу уустук кэми сэлиэнньэлэрбит этэҥҥэ аһаралларыгар эрэнэбин», -- диэн Алексей Засимович иһитиннэрбит.
Хаартыска Ил Түмэн пресс-сулууспатыттан.
-
0
-
0
-
0
-
0
-
0
-
0
