Тэрээһини Ил Түмэн Бэрэссэдээтэлин солбуйааччы-судаарыстыба тутулугар уонна сокуону оҥорууга сис кэмитиэт бэрэссэдээтэлэ, «Арассыыйа норуоттарын Ассамбылыайата» уопсастыбаннай тэрилтэ эрэгийиэннээҕи салаатын салайааччыта Афанасий Владимиров салайан ыытта. Мунньахха ону тэҥэ Алексей Елисеевич Кулаковскай сиэннэрэ Лариса уонна Татьяна Реасовналар, Норуоттар доҕордоһууларын дьиэтин Ресурнай киинин салайааччыта Екатерина Егорова, СӨ тас дьыалаларга уонна норуоттар доҕордоһууларын министиэристибэтин нассыыналынай бэлиитикэҕэ департаменын салайааччытын солбуйааччы Татьяна Парникова, «Арассыыйа норуоттарын Ассамбылыайата» уопсастыбаннай тэрилтэ эрэгийиэннээҕи салаатын толорооччу дириэктэрэ Антон Зуев уонна дэлэгээссийэ чилиэннэрэ кытыннылар.
Мунньах кэмигэр Саха Сирин норуоттарын ыччатын Ассамбылыайатын бэрэссэдээтэлэ Нурудин Нурудинов видеокэмпириэнсийэ сибээһинэн кытынна. Кини Дагестаан өттүттэн бииргэ үлэлээһини сүрүннүүр.
Бырайыак Арассыыйаҕа Норуоттар сомоҕолууларын сылын уонна Алексей Елисеевич Кулаковскай-Өксөкүлээх Өлөксөй биэс сылын чэрчитинэн ыытыллар
Бырайыак Арассыыйа Норуоттарын ассамбылыайатын уопсастыбаннай хамсааһынын Саха Сиринээҕи уонна Дагестааннааҕы салааларын тэрийиилэринэн ыытыллар. Саха улуу суруйааччыта, бөлүһүөгэ Өксөкүлээх Өлөксөй уонна Дагестаан классик суруйааччыта Расул Гамзатов нэһилиэстибэлэрин сомоҕолуу тутан икки өрөспүүбүлүкэ бииргэ үлэлээһиннэригэр далаһаны ууруоҕа.
Бу саҕалааһын Арассыыйа Норуоттарын ассамбылыайатын Саха Сиринээҕи салаатын ыччаттарга кынатын көҕүлээһининэн, Тас сибээс уонна норуоттар дьыалаларын итиэннэ Култуура уонна духуобунай сайдыы министиэристибэлэрин өйөбүллэринэн оҥоһуллар. Түмүк дьаһал балаҕан ыйыгар, Расул Гамзатов төрөөбүт күнүгэр, Дагестааҥҥа буолуоҕа.
Биллэрин курдук, Ил Дархан Айсен Николаев 2022 с. ыам ыйын 22 күнүгэр таһаарбыт ыйааҕынан, 2027 сылга саха суругунан уус-уран литэрэтиирэтин төрүттээччи, бөлүһүөк А.Е. Кулаковскай-Өксөкүлээх Өлөксөй төрөөбүтэ 150 сыла бэлиэтэнэринэн, 2023-2027 сыллары Өксөкүлээх Өлөксөй биэс сылынан биллэриллибитэ. Ол чэрчитинэн, Алексей Кулаковскай нэһилиэстибэтин үөрэтэр-сырдатар соруктаах араас бырайыактар, аахсыйылар тэриллэн үлэлииллэр.
-
0
-
0
-
0
-
0
-
0
-
0
