Тэрээһин быдан саҕаланыан инниттэн бэрт үгүс киһи тоҕуоруспута Маай бырааһынньыктарыгар параадка мустууну санатта. Оннук элбэх, бырааһыыньыктыы өрө көтөҕүллүбүт дьон, тэрилтэлэрин былааҕын күөрэччи көтөхпүтүнэн кэлбиттэрин көрөн киһи санаата үөрэр.
9 чааска сөтүөлүүр сир киинигэр туруоруллубут сыананы тула дьон үмүөрүччү мустан аахсыйаны аһыы сиэрэ-туома бэрт сэргэхтик барда. Бу кэмҥэ Саха Өрөспүүбүлкэтин Ил Дархан Айсен Николаев кэлэн, аахсыйаҕа кыттыһан субуотунньук дьонун санаатын дьүөрэлэһэрдии тыл эттэ.
-Ааспыт 2025 сылга Таатта улууһун Чычымах орто оскуолатын үөрэнээччилэрэ Бүттүүн Арассыыйатааҕы аахсыйаҕа кыттыһан Амма өрүс кытылын ыраастаһыныгар субуотунньуктаан туоннанан бөҕү-саҕы хомуйан, бу аахсыйаны өйөөбүттэрэ. Ол түмүгэр бастыҥнарынан ааттанан, быйыл, 2026 сылга бу аахсыйа Арассыыйаҕа Саха Сириттэн саҕаланар.
Айылҕаҕа сыһыаммытын, экологическай өйү-санааны уопсастыбаҕа олохсутуу маннык аахсыйаларынан үөскэтиллэн, тирэх ылан биһиги уулаах эйгэбитин-улуу эбэлэрбит эко ситимнэрин чөл туруктаах хаалларыахтаахпыт. Бүгүҥҥү улуу Өлүөнэ эбэбит кытылын ыраастааһыныгар кыттыыбыт, ыраас экологияҕа дьулуһуубут туоһутунан буолар. Аахсыйаҕа үтүө санааҕытынан кыттаргыт иһин махтанабын, - диэн Айсен Сергеевич алгыс тылын анаата.
Салгыы РФ айылҕа харысталбын миниистирин солбуйааччы Цыганов Константин Анатольевич эҕэрдэ тылын видеонан көрдөрбүттэригэр, бу аахсыйа 12 сылын ыытылларын, ол кэм устата дойду үрдүнэн 11 тыһыынча ахсааннаах күөлтэн, үрэхтэн, өрүстэн 11 мөлүйүөнтэн тахса тахса туонна бөх эбэлэр кытылларыттан, түгэхтэриттэн хомуллубутун бэлиэтээтэ уонна кылаабынайа, дьон өйүгэр-санаатыгар, ыччаттарга айылҕаҕа харыстабыллаах сыһыаны бөҕөргөтөр, күүһүрдэр диэн эттэ.
Салгыы субуотунньукка кэлбит дьон анаммыт сирдэринэн икки хамаандаҕа арахсан кытылы ыраастааһыҥҥа турунна. Бастакы хамаанданы «Дыгын оонньууларын» хас да төгүллээх кыайыылааҕа Егор Филиппов, иккис хамаанданы биллиилээх блогер Наталья Алмаз сирдээн туруннулар.
Хаартыскалар ааптар түһэриитинэн
-
2
-
0
-
0
-
0
-
0
-
0
