Кини этэринэн, киин куоракка уочараттары суох гынар туһуттан чааһынай АЗС-тарга табаарынан сойуом көрүллүөҕэ.
Ил Дархан бэлиэтээбитинэн, РФ Бырабыыталыстыбатын бэрэссэдээтэлин солбуйааччы Александр Новактыын уонна федеральнай суһал ыстаабы кытта кэпсэтиилэр ыытыллыбыттар. Билигин сорох ньиэби таҥастыыр собуоттар өрөмүөн кэнниттэн үлэлэрин чөлүгэр түһэрэн эрэллэр.
Дьокуускайга уочараттар туохтан сылтаан үөскээбиттэрин Айсен Николаев маннык быһаарда: «Дьокуускайга кыһалҕа чааһынай хампаанньалар уматыгы атыылааһыны биллэрдик хааччахтаабыттарыттан таҕыста. Онон сүрүн ыарахаттар барыта судаарыстыбаннай «Саханефтегазсбыт» тэрилтэҕэ сүктэрилиннэ».
Ону бэрээдэктиир туһуттан билигин «Сибойл» хампаанньаҕа «Саханефтегазсбыт» нөҥүө табаарынан сойуом бэриллэр. Ол түмүгэр «Сибойл» АЗС-тара дьоҥҥо бэнсиини атыылаан саҕалыахтара. Маны таһынан, бэйэ уматыктаах «Туймаада-Нефть» хампаанньаны кытта бэнсиини атыылааһыны кэҥэтэр туһунан кэпсэтиилэр түмүктэнэр түһүмэхтэригэр кэлбиттэр. Ил Дархан чааһынай хампаанньалар нэһилиэнньэ иннигэр эппиэтинэстэрин өйдүүллэригэр саарбахтаабатын эттэ.
«Ньиэби таҥастыыр собуоттартан бэнсиин, бастан туран 92-с уонна 95-с мааркалаах, кэлиэр диэри, үөскээбит хааччахтааһыннары аҕыйатар туһуттан «Саханефтегазсбыт» хампаанньа бары кыаҕын туһаныаҕа», — диэн Айсен Николаев эппитин СӨ Суһал ыстааба иһитиннэрэр.
Өрөспүүбүлүкэ салалтата “СибОйл” уонна “Туймаада-нефть” хампаанньаларга бэнсиини иэс биэрэн, кинилэр АЗС-тарын нөҥүө бэнсиини кутан саҕалыырга сорудах биэрдэ. Онон “СТНС” АУо бэнсиинин бу саппыраапкаларынан үллэрэн кутан саҕалаата. “СибОйл” номнуо иэс ылан, кутан саҕалаан эрэр. Билигин “Туймаада-нефть” салалтатын кытта нуорманы үрдэтэр туһунан кэпсэтиилэр бара тураллар.
Ил Дархан Айсен Николаев иһитиннэрбитинэн, быйылгы сыл биир суолталаах боппуруоһа - хоту улуустарга таһаҕаһы тиэрдии бүтүннүү быһаарыллыбыт, о.э. уматык тустаах кээмэйэ уу аалларыгар тиэллэн номнуо устан иһэр. Оттон өрөспүүбүлүкэҕэ эбии уматыгы тиэйэн аҕалыы салҕанан бара турар, саҥа баартыйа бэнсиин хайыы үйэ айаҥҥа туруммут.
СӨ Суһал ыстаабын дааннайдарыгар олоҕуран, атырдьах ыйын 24 күнүн 15 чаастааҕы туругунан уматыгы ханна куттарыахха сөбүн туһунан таһаарабыт.
«Саханефтегазсбыт» сапыраапкаларыгар АИ-92 уонна АИ-95 мааркалаах бэнсиини, ону таһынан сэлээркэни биир массыынаҕа 20 лиитирэҕэ диэри куталлар. Төлөбүрү кумааҕы харчынан да, баан карточкатынан да оҥоруохха сөп. Бу хааччах Дьокуускай куорат иһигэр маннык аадырыстарга баар АЗС-тарга үлэлиир:
- № 2 АЗС – Труда уул., 4а;
- № 6 АЗС – Жатайдааҕы суол быһа охсуһуута, 1;
- № 1401 ОПТИ АЗС – Маҕаннааҕы суол быһа охсуһуута, 1;
- № 51 АЗС – 50 лет Советской Армии уул., 49б;
- № 62 АЗС – Хатыҥ Үрэх шоссета, 4 км, 8а.
Оттон «Туймаада-Нефть» хампаанньа АЗС-тарыгар АИ-92 уонна АИ-95 беэнсиини тустаах мобильнай сыһыарыы уонна уматык каарталарын нөҥүө эрэ атыылаһар кыах баар.
Ол эрээри, суоппардарга табыгастаах буоллун диэн, хампаанньа сорох АЗС-тарыгар АИ-92 бэнсиини көннөрү (уу харчынан уонна баан каартатынан) атыылыыр. Ол аадырыстара манныктар:
- МАЗС-1 – 50 лет Октября автотрасса, 14з;
- МАЗС-2 – 50 лет Октября автотрасса, 1з;
- АЗС-3 – Дзержинскэй уул., 56А;
- АЗС-4 – Бүлүүлүүр тракт, 4 км, 6а.
Бүгүн «СибОйл» Покровскайдыыр суол 4 км АИ-95 бэнсиини көннөрү (уу харчынан уонна баан каартатынан) атыылыаҕа.
ххх
Балаһыанньаны Саха Сирин салалтата хонтуруолга ылан олорор.Ол курдук, 52,7 тыһ. туонна уматык тимир суолунан, улахан массыыналарынан уонна уу суолунан иһэрин туһунан СӨ гражданскай оборуона дьыалаларыгар уонна нэһилиэнньэҕэ куттал суох буолуутун хааччыйыыга миниистирин солбуйааччы Яна Наумова бэҕэһээ атырдьах ыйын 23 күнүгэр биллэрбитэ. Кини РФ энэргиэтикэҕэ уонна илини сайыннарыыга министиэристибэлэрэ собуоттан уматыгы тиэйиини түргэтэппиттэр диэн быһаарар.
Хаартыска Марианна Тыртыкова түһэриитэ.
-
0
-
0
-
0
-
0
-
0
-
0
