Виктор АБДь саҕаламмыт сылыгар - 2022 сыл күһүнүгэр быстах ыҥырыыга түбэһэн, кыргыһыы толоонугар сылдьыбыта төрдүс сыла. “Зема” диэн позывнойы ылыммыт байыас Саха Сириттэн уон үһүс Арассыыйа Дьоруойа буолан, төрөөбүт дойдутун дорҕоонноохтук ааттатта.
Бүгүн, атырдьах ыйын бүтэһик күнүгэр Дьокуускайга кинини үрдүк судаарыстыбаннай наҕараадатынан үөрүүлээх быһыыга-майгыга чиэстээтилэр. Ил Дархан Айсен Николаев Дьоруой хорсун быһыытын Ийэ дойдута үрдүктүк сыаналаабытынан истиҥник эҕэрдэлээтэ.
“Биһиги эйигинэн киэн туттабыт. Эр санаалааххын, идэҕин үрдүктүк баһылаабыккын, кыргыһыы толоонугар аныгы технологияны сатабыллаахтык туттаргын элбэхтик иһиттим. Эн хорсун быһыыҥ, Ийэ дойдугар бэриниилээх буолууҥ биһиэхэ барыбытыгар холобур буолар. Өрөспүүбүлүкэ норуотун аатыттан эйиэхэ, төрөппүттэргэр Галина Нагимовнаҕа, Андрей Викторовичка, кэргэҥҥэр Александра Алексеевнаҕа махталбытын биллэрэбит. Арассыыйа Дьоруойа буолуу бочуоттаах, ону кытта эппиэтинэстээх аат-суол буолар.
Байыаннай дьайыы саҕаланыаҕыттан биһиги биир дойдулаахтарбыт дойдубут инники кэскилин туһугар хорсуннук сэриилэһэллэр. Маннык байыастардаах буолан, иннибит диэки эрэллээхтик баран иһэбит. Хас биирдиигитинэн киэн туттабыт, махтанабыт!”
Гвардия сержана, отделение хамандыыра Виктор Софронов, бу наҕараада Анал байыаннай дьайыыга бииргэ Аҕа дойдуларын көмүскүү сылдьар сылдьар сулууспалаахтарын, төрөппүттэрин уопсай наҕараадалара буоларын эттэ.
Виктор Софронов мустубут дьоҥҥо анаан: “Арассыыйа Дьоруойа буолуу улахан чиэс, эппиэтинэс. Эһиэхэ барыгытыгар улахан махтал, уолаттары өйүүргүтүн иһин. Мин Өлүөхүмэҕэ улааппытым, төрөөбүт дойдум миэхэ күүһү-уоҕу биэрэр. Кыайыы биһиэнэ буолуоҕа!” , - диэн дьоруой дойдутугар сылдьан баран, төттөрү байыаннай дьайыы суонатыгар барарын эттэ.
Ил Дархан Виктор Софроновка 1,5 мөл. солкуобайдаах сэртипикээти уонна аата-суола суруллубут алмаас куоппуйатын бэлэхтээтэ.
Виктор үрдүк наҕараадатынан өлүөхүмэлэр үөрүүлэрэ улахан. Кинини - Арассыыйа дьоруойун Өлүөхүмэ барыта, үөрэммит оскуолата үөрэ-көтө кэтэһэллэр, киэн тутталлар диэн биир дойдулаахтара биллэрэллэр.
Виктор Софронов Саха Сирин уон үһүс Арассыыйа Дьоруойа буолар. Бу иннинэ үрдүк судаарыстыбаннай Александр Колесов, Филипп Евсеев, Алексей Неустроев, Игорь Юргин, Николай Соболев, Дмитрий Егоров (өлбүтүн кэннэ), Николай Евдокимов, Родимир Максимов, Дмитрий Куценко, Андрей Григорьев, Петр Киприянов (өлбүтүн кэннэ) уонна Алексей Петров наҕараадаламмыттара.
Хаартыска ЯСИА
-
1
-
0
-
0
-
0
-
0
-
0
