Тэрээһин чэрчитинэн, Саха Өрөспүүбүлүкэтин бырабыыталыстыбата уонна «Суудунаны оҥорор холбоһуктаах корпорация» бииргэ үлэлэһии туһунан дуогабарга илии баттаатылар. Докумуон чэрчитинэн, өрөспүүбүлүкэ флотун саҥардыы былааннанар. Бу дуогабар икки түргэн сырыылаах «Котлин-Ф» пассажирскай катамараны уонна биэс соһор-үтэр буксиры тутууну былаанныыр.
Дуогабар сүрүн сыалынан-соругунан нэһилиэнньэҕэ тырааныспар табыгастаах буолуутун үрдэтии уонна Аартыка, хотугу оройуоннарга таһаҕаһы тиэйиини тупсарыы буолар. Саҥа суудуналар социальнай суолталаах маршруттарынан дьону таһарга анаан «Өлүөнэтээҕи холбоһуктаах өрүс пароходствотыгар» бэриллиэхтэрэ. Пассажирдарга анаммыт катамараннар 200 киһини батараллар. Оттон буксирдар ис уу суолларынан, ол иһигэр чычаас уулаах сирдэринэн, таһаҕаһы, бастатан туран, хотугу таһаҕаһы, таһарга аналлаахтар.
«Бүгүн биһиги иннибитигэр флоту утумнаахтык саҥардыы былааны турар. Саҥа суудуналар өрөспүүбүлүкэ олохтоохторо айанныылларыгар сөптөөх усулуобуйа тэриллэригэр төһүү күүһүнэн буолуохтара, оттон аныгы буксирдар дьон олоҕор-дьаһаҕар наадалаах таһаҕастары, ол иһигэр хотугу таһаҕаһы тиэйиигэ көмөлөһүөхтэрэ», — диэн Ил Дархан Айсен Николаев бэлиэтээтэ.
Бииргэ үлэлэһии иккис хайысхатынан «ЛОРП» ПАУо таһаҕаһы таһар флотун саҥардыынан буолар. Тутуу былааныгар биэс буксиры тутуу баар, кинилэр чуолаан хоту улуустарга таһаҕаһы тиэйиигэ кыттыахтара. Соһор-үтэр буксирдар ис уу суолларыгар, ол иһигэр дьара уулаах сирдэргэ уонна көмүөл кэмигэр уустук быһыыга-майгыга үлэлииргэ аналлаахтар.
«Биһиги дойду иһинээҕи кыһалҕалары быһаарарга үлэлиибит. Аныгы уонна ураты суолталаах этиилэри олоххо киллэрэргэ үлэлиибит. Суудуналары тутуу бырайыагын тиэхэньиичэскэй былааныттан саҕалаан, ону тутан олоххо киллэрэргэ бэлэммит», — диэн «Суудунаны тутар холбоһуктаах корпорация» АУо дириэктэрдэрин сэбиэтин бэрэссэдээтэлэ Андрей Костин тоһоҕолоон бэлиэтээтэ.
XI Илиҥҥи экэнэмиичэскэй пуорум балаҕан ыйын 1-4 күннэригэр Владивосток куоракка ыытыллар. Пуорум быйылгы сүрүн тиэмэтинэн «Уһук Илин — дьон туһугар сайдыы» диэн буолар.
Хаартыскаҕа Андрей Сорокин (ЯСИА) түһэриитэ.
-
0
-
0
-
0
-
0
-
0
-
0
