Ил Тумэн социальнай бэлиитикэҕэ, үлэҕэ уонна дьарыктаах буолууга бастайааннай кэмитиэтин бэрэссэдээтэлэ Алена Атласова сорук дисциплиналар икки ардыларынааҕы майгытын тоһоҕолоон бэлиэтээтэ: Аартыкаҕа киһи доруобуйата мэдиссиинэнэн эрэ буолбакка, тырааныспар өттүнэн тиийимтиэ, каадырынан хааччыллыы, экэниэмикэ уонна үгэс буолбут олох ньыматынан быһаарыллар. Хат дьахталлары өйөөһүҥҥэ уонна демографическай бэлиитикэҕэ территориальнай дьаһалларга ураты болҕомто уурулунна. Холобур, Аартыка оройуоннарыгар оҕо төрүүрүгэр дьиэ кэргэн ороскуота 1 мөл.солк. тиийиэн сөп, бу, биллэн турар, аадырыстаах өйөбүлү эрэйэр.
Үөрэх уонна билим министиэристибэтин бэрэстэбиитэлэ үөрэх эйгэтигэр доруобуйаны харыстыыр технологиялар суолталарын, педагогтары кытта үлэлээһини уонна доруобуйаны харыстааһын кэлим мадьыалын (инфраструктура, үөрэх бырассыаһа, физкултуура, сырдатыы, профилактика) киллэриини бэлиэтээтэ. Аартыкаҕа аһылык уратытын учуоттааһын уонна спортивнай инфраструктураны сайыннарыы наадата бэлиэтэннэ.
Хотугу сир аҕыйах ахсааннаах норуоттарын боппуруостарыгар уонна Аартыка дьыалаларыгар кэмитиэтин бэрэссэдээтэлэ уонна НПК тэрийээччитэ Елена Голомарева сокуону оҥорууга научнай төрүттэр суолталарын уонна маннык хабааннаах кэмпириэнсийэлэри сыл аайы ыытыы наадатын тоһоҕолоон бэлиэтээтэ. Практическай дьаһаллар истэригэр телемэдиссиинэни сайыннарыы, мэдиссиинэ үлэһиттэрин квалификацияларын үрдэтии, доруобуйаҕа эппиэтинэстээх сыһыан быраактыкаларын киллэрии уонна удьуор утумнааһынынан куттал үөскүүрүн учуоттааһын баар буолуохтаахтара ыйылынна.
Өрөспүүбүлүкэтээҕи психологическай киин дириэктэрэ Владимир Скрябин психоэмоциональнай ноҕурууска үрдээһинигэр уонна дьоҥҥо формальнайа суох, ирдэбиллээх уонна онуоха харыстабыллаах сыһыан наадатыгар, ону тэҥэ кэлэр социальнай уларыйыылары учуоттааһын суолтатыгар, ол иһигэр АБДь кыттыылаахтара төннүүлэринэн сибээстээн болҕомто ууруллуохтааҕын эттэ.
Пленарнай мунньах кэмигэр эспиэртэр уонна былаас уорганнарын бэрэстэбиитэллэрэ хотугу территориялар туруктаах буолууларыгар — логистикаттан уонна үбүлээһинтэн саҕалаан төрүт омуктар доруобуйаларын үгэс буолбут быраактыкаларыгар тиийэ көрүүлэрин, этиилэрин билиһиннэрдилэр.
Ил Түмэн пресс-сулууспатын матырыйаалынан. Хаартыскаларга Василий Кононов түһэриилэрэ.
-
0
-
0
-
0
-
0
-
0
-
0
