Быыстапка тэриллибит сыалын-соругун, уратытын туһунан бырайыак ааптара, Саха Өрөспүүбүлүкэтин култууратын үтүөлээх үлэһитэ Татьяна Гоголева маннык кэпсээтэ:
– Улуу тириэньэр Дмитрий Коркин үөрэнээччилэрэ успуорка эрэ буолбакка, норуот хаһаайыстыбатын бары салааларыгар ситиһиилээхтик үлэлээбиттэрэ, үлэлии да сылдьаллар. Бу атыы-эргиэн киинин 1990-с сыллардаахха кини үөрэнээччилэрэ, билигин биһиги кэккэбитигэр суох, төрдүс ыҥырыылаах Ил Түмэн дьокутаата Александр Крылов, аан дойду кылаастаах успуорт маастара Афанасий Заболоцкай уонна күн бүгүн бу атыы-эргиэн киинин салайар, Ил Түмэн дьокутаата Иван Данилов тэрийбиттэрэ. Саха норуотун духуобунаһын байытар араас дьаһаллары ыытар сыалтан, Мандар Ууска бырайыактатан 400 кв миэтэрэ иэннээх анал Быыстапкалыыр сааланы оҥорбуттара. Дьэ манна биһиги, Коркин хамаандата (мин Чурапчыга, Коркин интэринээт-оскуолатын Павел Пинигины кытары бииргэ үөрэнэн бүтэрбитим) «Коркинныы олоруохха! Коркинныы айыахха!» диэн быыстапканы аан бастаан 2018 сыллаахха, Дмитрий Петрович 90 сааһыгар тэрийбиппит.
Биллэрин курдук, сыл-хонук элэҥнэччи ааһар, көлүөнэ түргэнник солбуһар, улуу тириэньэри кытары бииргэ үлэлээбит дьон билигин суохтар, дьарыктаабыт оҕолоро номнуо сааһырдылар, онон дьон-сэргэ, чуолаан ыччаттар, Дмитрий Петрович Коркин уонна киниэхэ тирэх буолбут, кини дьыалатын салҕаан үлэлээбит, үлэлии сылдьар дьону, Д.П. Коркин аатынан өрөспүүбүлүкэ таһымнаах Чурапчытааҕы спортивнай интэринээт-оскуола иитэр-үөрэтэр үлэһиттэрин итиннэ онтон үүнэн тахсыбыт ыспарсымыаннары биллиннэр-көрдүннэр диэммит бу быыстапканы сыллата тэрийэбит. Пандемия кэмигэр эрэ турбатахпыт, ол оннугар хаһыаттарга анал сиэрийэнэн ыстатыйалары таһааран, электроннай көрүҥүнэн тарҕаппыппыт. Тугу булбуппутун барытын чөкөтөн, альбом оҥорон иһэбит, онон Дмитрий Петровичка сыһыаннаах матырыйааллары мантан булуохха сөп. Бүгүҥҥүлээх киһи сарсыҥҥылаах, бэҕэһээҥҥитин өйдүүр-саныыр, силиһин-мутугун билэр киһи ол – тирэхтээх. Бастакы экспозициябит Сир шарыттан саҕаланар. Бу үс саха уола, Дмитрий Петрович Коркин дьарыктаабыт бөҕөстөрө -- Павел Пинигин, Роман Дмитриев уонна Александр Иванов 1976 сыллаахха ыытыллыбыт Монреаллааҕы Олимпийскай оонньууларга ситиһиилэрин көрдөрөр.
Быыстапка быйыл тыа сирин ыччатын успуорка, чөл, чэгиэн олоххо, үрдүкү кирбиилэргэ сирдээбит-көҕүлээбит «Урожай» уопсастыба 75 сылыгар, Саха Өрөспүүбүлүкэтигэр көҥүл тустуу сайдыбыта 70 сылыгар, Павел Пинигин, Роман Дмитриев, Александр Иванов Монреаллааҕы XXI сайыҥҥы Олимпийскай оонньууларга өрөгөйдөрүн 50 сылыгар, Василий Гоголев Олимпиадаҕа тэҥнээх улахан күрэхтэһиигэ, «Үтүө дьулуур оонньуутугар», кыайбыта 40 сылыгар ананан туруорулунна. Инньэ гынан, нэдиэлэ устатыгар үс олимпиец, үс улуу тустуук чыпчаал көрдөрүүлэрин ырытар, саҥа чахчылары көрдүүр, үйэтитэр тэрээһиннэр ыытылыннылар.
Хаартыска: Ааптар түһэриитэ.
-
0
-
0
-
0
-
0
-
0
-
0
