Уопсастыба

Балаҕан ыйын 6 күнүгэр Сунтаар улууһун дьаһалтатын баһылыга Анатолий Григорьев салайааччылаах дэлэгээссийэ кэлэн, биир дойдулаахтарын, ССРС успуорка маастара, Саха АССР үтүөлээх тириэньэрэ, Монреаллааҕы Олимпийскай оонньуу үрүҥ көмүс призера Алексанр Иванову чиэстээтилэр.
Балаҕан ыйын 8 күнүгэр ыытыллыбыт «Эдьигээн – олимпийскай чөмпүйүөн Роман Михайлович Дмитриев дойдута» диэн тэрээһиҥҥэ биир дойдулаахтара, аймахтара, Эдьигээнтэн төрүттээх куорат олохтоохторо, доҕотторо, ол иһигэр, Алексанр Иванов дьиэ кэргэнинэн кэлэн, барыта сүүстэн тахса киһи түмсэн, бастакы олимпийскай чөмпүйүөн, ССРС успуордун үтүөлээх маастара, үтүөлээх тириэньэрэ Роман Дмитриев сырдык аатыгар сүгүрүйдүлэр, истиҥ-иһирэх ахтыылары оҥордулар. Роман Михайлович 2008 с. төрдүс ыҥырыылаах Ил Түмэн дьокутаатынан талыллан, РФ Федеральнай Мунньаҕар Ил Түмэн бастайааннай бэрэстэбиитэлинэн үлэлээбитэ, ол иһин тэрээһиҥҥэ Ил Түмэн төрүт олохтоох, аҕыйах ахсааннаах хотугу омуктар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева кытынна. 

– Саха улуу тустууктара Роман Дмитриев, Павел Пинигин, Александр Иванов Монреаллааҕы олимпиадаҕа өрөгөйдөөх кыайыылара саха тустуутун Аан дойду таһымыгар таһаарбыта, кинилэр тренердэрэ Дмитрий Коркиҥҥа бүтүн дойду болҕомтотун тардыбыта. Роман Дмитриев биһиэхэ булгуруйбат модун санаа, үтүө дьулуур Ийэ дойдуга муҥура суох таптал, бэриниилээх буолуу холобура буолар. Мин тус бэйэм Роман Михайловиһы кытары алтыспыт-бодоруспут дьоллоохпун, кинини кытары хас биирдии көрсүһүү ураты суолу-ииһи, өйдөбүлү хаалларара. Кини өрөспүүбүлүкэ социальнай-экэнэмиичэскэй сайдыытыгар киллэрбит кылаатын учуоттаан, Ил Дархан Айсен Николаев Эдьигээн бөһүөлэгэр көҕүлээн туттарбыт успуорт комплекса саҥа көлүөнэ чөмпүйүөннэри иитэн таһаарар кыһа буолла. Күндү доҕоттор, номоххо киирбит биир дойдулааххыт, олимпийскай чөмпүйүөн, саха улуу бөҕөһө Роман Дмитриев нэһилиэстибэтин үйэтитиигэ утумнаах үлэҕит иһин, Эдьигээн улууһун олохтоохторугар махталбын биллэрэбин,-- диэтэ норуот дьокутаата.

Балаҕан ыйын 9 күнүгэр «Чурапчы – успуорт туоната, олимпийскай чөмпүйүөн Павел Павлович Пинигин дойдута» диэн төгүрүк остуол ыытылынна. Ону Чурапчы улууһун дьаһалтатын баһылыгын социальнай боппуруостарга солбуйааччы Мария Кронникова салайан ыытта. Улуу тириэньэр үлэтин-хамнаһын сырдатыыга, үйэтитиигэ үлэтин сыаналаан, бу быыстапканы тэрийээччи Татьяна Гоголеваҕа «Чурапчы улууһун бочуоттаах бэтэрээнэ» диэн бэлиэни туттарда.
Монреаллааҕы олимпиада чөмпүйүөнэ, «Бочуот знага», «Хотугу сулус» уордьаннар кавалердара, ССРС успуордун үтүөлээх маастара, Саха Өрөспүүбүлүкэтин физическэй култууратын үтүөлээх үлэһитэ, экстра-кылаас категориялаах норуоттар икки ардыларынааҕы судьуйа, Ил Түмэн дьокутаата Павел Пинигин дойду устуоруйатыгар хатыламмат кыайыыларын, үлэтин-хамнаһын итиэннэ кинини улахан түһүлгэҕэ таһаарбыт чулуу тириэньэр Д.П. Коркин тустарынан элбэх тыл этилиннэ, ахтыы оҥоһулунна (Павел Павлович бэйэтэ Киргизияттан кыайан кэлбэтэх).

Ил Түмэн бастакы уонна алтыс ыҥырыыларыга дьокутаата Михаил Гуляев Чурапчыттан 175 ССРС успуордун маастара, 13 норуоттар икки ардыларынааҕы кылаастаах успуорт маастара, 4 ССРС успуордун үтүөлээх маастара, үс олимпиец иитиллэн тахсыбытын холобурдаан, Дмитрий Петрович Коркин өрөспүүбүлүкэҕэ физическэй култуура уонна успуорт сайдыытыгар сүҥкэн кылаатын киллэрбитин бэлиэтээтэ. Д.П. Коркин аатынан интэринээт-оскуолаҕа дириэктэрдээбит, Чурапчытаҕы физическэй култуура уонна успуорт үнүстүүтүгэр ректордаабыт, Успуорт судаарыстыбаннай кэмитиэтин салайбыт сылларыгар улуу тириэньэри үйэтитиигэ үлэтин туһунан кэпсээтэ.
Аны икки сылынан, 2028 сылга, улуу тириэньэр Дмитрий Коркин 100 сыла бэлиэтэниэхтээх, ону көрсө Бырабыыталыстыба Бэрэссэдээтэлин солбуйааччы Сергей Местников салайааччылаах хамыыһыйа тэриллибит, былааннаммыт дьаһаллар торумнара оҥоһулла сылдьар, сотору бигэргэтиллиэхтээх эбит. Дьэ бу дьаһалларга Дмитрий Петрович огдооботугар Александра Семеновнаҕа, кыыһыгар Гея Дмитриевнаҕа Дьокуускайга сир учаастагын ылан, дьиэ тутан биэрэр туһунан этиини киллэрэри Олимпийскай оонньуу үрүҥ көмүс призера Алексанр Иванов наадалааҕынан аахта. Ону сэргэ ыраах Сунтаартан Чурапчыга кэлэн хайдах үөрэммитин туһунан аҕынна.

Дмитрий Петрович төрөөбүт-үөскээбит Кытаанах нэһилиэгин баһылыга Иван Пономарев улуу тириэньэр төрөөбүт күнүгэр, балаҕан ыйын 5 күнүгэр, миитин оҥорбуттарын, «Коркинец» тэрилтэ иһинэн аһыллыбыт пуондаҕа бастакы үбү укпуттарын, «Коркин ыллыгынан» туристическай маршруту тобулбуттарын туһунан кэпсээтэ.
Хаартыска: Петр Павлов уонна ааптар түһэриилэрэ.