Уопсастыба

Чурапчы улууһун борокуратуурата Чурапчы сэлиэнньэтин 1980 сыллаах төрүөх олохтооҕор холуобунай дьыаланан буруйдуур түмүгү бигэргэттэ. Кини РФ Холуобунай кодексатын 111-с ыстатыйатын 4-с чааһынан (киһи доруобуйатыгар ыарахан эмсэҕэлээһини соруйан оҥоруу, сэрэҕэ суохтан өлүүгэ тиэрдии) буруйданар.

Силиэстийэ сабаҕалыырынан, 2014 сыл от ыйыгар буруйданааччы итирик туруктаах сылдьан, Чурапчы сэлиэнньэтин Константинов аатынан уулуссаҕа турар дьиэлэртэн бииригэр аймаҕын кытта этиһии кэмигэр быһаҕынан түөскэ анньыбыт.
Эмсэҕэлээччи дьиэттэн тахсыбыт эрээри, ылбыт бааһыттан чугас турар атын дьиэ кирилиэһигэр тыына быстыбыт. Бу буруй уһун кэм устата арыллыбакка турбут. Кэлин оперативнай тэрээһиннэр ыытыллыбыттарын түмүгэр, буруйданааччы кимэ биллэн тутуллубут.
РФ Силиэстийэлиир кэмитиэтин Саха сиринээҕи управлениетын Чурапчытааҕы оройуоннар икки ардыларынааҕы силиэстийэлиир отдела силиэстийэлээбит дьыалатын улуус борокуратуурата суукка ыыппыт.